चित्रपट आणि वेब सिरीज पाहण्यासाठी ओटीटी प्लॅटफॉर्मचा वापर वाढला आहे. मात्र प्रत्येक ॲपचे स्वतंत्र सबस्क्रिप्शन घेणे खिशाला परवडणारे नसते. हीच गरज ओळखून रिलायन्स जिओ, एअरटेल आणि व्होडाफोन आयडिया या कंपन्यांनी २०० रुपयांपेक्षा कमी किमतीत डेटासह मोफत ओटीटी फायदे देणारे स्वस्त प्रीपेड प्लॅन्स आणले आहेत. या प्लॅन्सची किंमत १५४ रुपयांपासून सुरू होते.
व्होडाफोन आयडियाचा १५४ रुपयांचा प्लॅन
सध्या देशातील सर्वांत स्वस्त ओटीटी डेटा पॅक व्होडाफोन आयडियाकडे आहे. कंपनीच्या १५४ रुपयांच्या ‘व्ही मूव्हीज अँड टीव्ही लाइट’ पॅकमध्ये ३० दिवसांची वैधता आणि दोन जीबी अतिरिक्त डेटा मिळतो. या पॅकमध्ये सोनी लिव्ह, झी फाईव्ह आणि फॅनकोडसह एकूण १८ हून अधिक ओटीटी ॲप्सचे सबस्क्रिप्शन मोफत मिळते. हा केवळ डेटा पॅक असल्याने यात कॉलिंग किंवा एसएमएसची सुविधा मिळत नाही.
जिओ आणि एअरटेलचे प्लॅन्स
जिओच्या १७५ रुपयांच्या डेटा पॅकमध्ये २८ दिवसांच्या वैधतेसह १० जीबी हाय-स्पीड डेटा मिळतो. यासोबत सोनी लिव्ह, झी फाईव्ह आणि लायन्सगेट प्लेसह एकूण १० ओटीटी ॲप्स जिओ टीव्ही मोबाईल ॲपवर पाहता येतात. डेटा आणि ओटीटीसोबत अमर्याद कॉलिंगही हवे असलेल्यांसाठी जिओने ३२९ रुपयांचा प्लॅन आणला आहे. यात २८ दिवसांसाठी दररोज दीड जीबी डेटा, अमर्याद कॉल्स आणि जिओसावन प्रो व जिओटीव्हीचे फायदे मिळतात.
एअरटेलने १८१ रुपयांचा डेटा पॅक आणला आहे. यात १५ जीबी हाय-स्पीड डेटा मिळतो. त्यासोबत ‘एअरटेल एक्सस्ट्रीम प्ले प्रीमियम’चे सबस्क्रिप्शन दिले जाते, ज्याद्वारे सोनी लिव्हसह २२ हून अधिक प्रादेशिक आणि हिंदी ओटीटी ॲप्स एकाच ठिकाणी पाहता येतात. हे तिन्ही स्वस्त प्लॅन्स ‘डेटा ॲड-ऑन’ श्रेणीतील असल्याने त्यांचा लाभ घेण्यासाठी सिम कार्डवर आधीच एक सक्रिय बेस रिचार्ज प्लॅन असणे आवश्यक आहे.
Leave a Reply