उत्तर प्रदेशात २०२७ मध्ये होणाऱ्या विधानसभा निवडणुकीच्या पार्श्वभूमीवर राजकीय हालचालींना वेग आला आहे. सत्ताधारी भाजपसह विरोधी पक्षातील काँग्रेस आणि समाजवादी पक्षानेही मोर्चेबांधणीला सुरुवात केली आहे. याच पार्श्वभूमीवर सोमवार, २३ नोव्हेंबरपासून काँग्रेस आणि समाजवादी पक्ष जागावाटपावर चर्चा सुरू करणार आहेत.
दोन्ही पक्षांमधील पहिली संयुक्त बैठक २३ नोव्हेंबरपासून सुरू होणार असून या बैठकीत आघाडीतील घटक पक्षांकडून मागणी करण्यात येणाऱ्या जागांवर चर्चा होण्याची शक्यता आहे. सूत्रांनी दिलेल्या माहितीनुसार, ही पहिली बैठक काँग्रेसचे खासदार प्रमोद तिवारी यांच्या निवासस्थानी होणार आहे.
सपाने स्थापन केली स्वतंत्र समिती
जागावाटपाच्या चर्चेसाठी समाजवादी पक्षाने स्वतंत्र समिती स्थापन केली आहे. या समितीत पक्षाचे राष्ट्रीय महासचिव आणि खासदार राम गोपाल यादव, उत्तर प्रदेशचे प्रदेशाध्यक्ष श्यामलाल पाल तसेच खासदार राजीव राय आणि इकरा हसन यांचा समावेश आहे.
दरम्यान, समाजवादी पक्षाचे प्रमुख अखिलेश यादव यांनी जागावाटपासाठी जिंकण्याची क्षमता हा महत्त्वाचा निकष असावा, असे मत व्यक्त केले आहे. उत्तर प्रदेशातील काही जागांवर काँग्रेसही विजय मिळवू शकते, असे सांगत त्यांनी त्या जागांबाबत आघाडीसमोर प्रस्ताव मांडण्याचे संकेत दिले आहेत.
मतभेदाची शक्यता फेटाळली
काँग्रेसचे खासदार इमरान मसूद यांनी रविवारी इंडिया आघाडीतील घटक पक्षांमध्ये अधिक चांगला समन्वय असण्याची गरज व्यक्त केली. आगामी निवडणुकीत आघाडीचा विजय निश्चित करण्यासाठी सर्व पक्षांनी एकत्रितपणे काम करणे आवश्यक असल्याचे त्यांनी सांगितले.
समाजवादी पक्षाचे खासदार अवधेश प्रसाद यांनीही जागावाटपावरून काँग्रेस आणि सपामध्ये मतभेद होण्याची शक्यता फेटाळून लावली. भाजप सरकारला सत्तेतून दूर करणे हे दोन्ही पक्षांचे समान उद्दिष्ट असल्याचे त्यांनी स्पष्ट केले. त्यामुळे जागावाटपाबाबत चर्चा करून योग्य निर्णय घेतले जातील, असेही त्यांनी नमूद केले.
काँग्रेसचे प्रवक्ते सुरेंद्र राजपूत यांनी आघाडीच्या चर्चेचा मुख्य उद्देश समाजातील वंचित आणि उपेक्षित घटकांना राजकीय प्रतिनिधित्व देणे हा असल्याचे सांगितले. मागासवर्गीय, दलित, आदिवासी, महिला, युवक, शेतकरी आणि अल्पसंख्याकांसह विविध समाजघटकांना विधानसभेत प्रतिनिधित्व मिळावे, यावर काँग्रेसचा भर असल्याचे त्यांनी स्पष्ट केले. त्यामुळे २०२७ च्या विधानसभा निवडणुकीसाठी काँग्रेस आणि समाजवादी पक्षामध्ये जागावाटपाचा नेमका फॉर्म्युला काय ठरणार, याकडे राजकीय वर्तुळाचे लक्ष लागले आहे.
Leave a Reply