धनुष आणि ममूटी यांची प्रमुख भूमिका असलेला ‘ओएम: ऑपरेशन मोल’ हा चित्रपट २० नोव्हेंबर रोजी थिएटरमध्ये प्रदर्शित झाला. रिलीजच्या पहिल्याच दिवसापासून या चित्रपटाने कमाईच्या बाबतीत चांगली आघाडी घेतली आहे. अवघ्या दोन दिवसांत या सिनेमाने जगभरात ६०.९० कोटी रुपयांचा टप्पा पार केला आहे. त्यामुळे बॉक्स ऑफिसवर या चित्रपटाची चांगलीच चर्चा रंगली आहे.
दोन दिवसांची कमाई कशी राहिली?
सुरुवातीच्या आकडेवारीनुसार, धनुषच्या ‘ओएम’ चित्रपटाने पहिल्या दिवशी भारतात १८.१० कोटी रुपयांची नेट कमाई केली. दुसऱ्या दिवशी म्हणजेच शनिवारी चित्रपटाच्या कमाईत काहीशी घट झाली असली, तरी त्याने १५.४० कोटी रुपयांचा गल्ला जमवला. या चित्रपटाची दोन दिवसांतील भारतातील एकूण नेट कमाई ३३.५० कोटी रुपयांवर पोहोचली आहे, तर भारतातील ग्रॉस कलेक्शन ३८.९० कोटी रुपये आहे. परदेशातील कमाईचाही चित्रपटाला चांगला फायदा झाला असून दोन दिवसांत परदेशातून २२ कोटी रुपये मिळाले आहेत. त्यामुळे जगभरातील एकूण कमाई ६०.९० कोटी रुपयांवर पोहोचली आहे.
१३ वर्षांनंतर धनुष-ममूटी एकत्र
या चित्रपटाचे आणखी एक खास वैशिष्ट्य म्हणजे धनुष आणि ममूटी यांची जोडी तब्बल १३ वर्षांनंतर पुन्हा एकदा मोठ्या पडद्यावर एकत्र आली आहे. याआधी हे दोघे २०१३ मध्ये ‘कम्मथ अँड कम्मथ’ या मल्याळम चित्रपटात एकत्र दिसले होते. त्यामुळे त्यांच्या चाहत्यांसाठी ‘ओएम’ हा चित्रपट विशेष ठरला आहे.
या चित्रपटात धनुष आणि ममूटी यांच्यासोबत साई पल्लवी, श्रीलीला, नसीरुद्दीन शाह आणि रेणू देसाई यांच्याही महत्त्वाच्या भूमिका आहेत. राजकुमार पेरियासामी यांनी या चित्रपटाचे लेखन आणि दिग्दर्शन केले आहे. ‘ओएम: ऑपरेशन मोल’ हा अॅक्शन थ्रिलर चित्रपट असून लाल चंदनाच्या तस्करीचे जाळे उद्ध्वस्त करण्यासाठी राबवण्यात येणाऱ्या एका गुप्त मोहिमेभोवती या चित्रपटाची कथा फिरते. या मोहिमेदरम्यान पोलिसांना अनेक आव्हानांचा सामना करावा लागतो. अॅक्शन, थरार आणि कलाकारांचा दमदार अभिनय यामुळे हा चित्रपट प्रेक्षकांचे लक्ष वेधून घेत आहे. आगामी रविवारच्या कमाईकडे सर्वांचे लक्ष लागले आहे.
Leave a Reply