जगभरात युद्धाचे स्वरूप झपाट्याने बदलत आहे. आधुनिक शस्त्रे, ड्रोन, इलेक्ट्रॉनिक युद्धतंत्र आणि वेगवान हालचालींना आता प्रचंड महत्त्व आले आहे. या पार्श्वभूमीवर भारतीय लष्कराने भैरव बटालियन ही विशेष लढाऊ तुकडी तयार केली आहे. पायदळ आणि पॅरा विशेष दल यांच्यातील दुवा म्हणून या तुकडीकडे पाहिले जात आहे.
भैरव बटालियनची रचना
या तुकडीत २५० विशेष प्रशिक्षित जवान आहेत. हे जवान कमी वेळेत जलद हालचाल करू शकतात. त्यांच्याकडे अत्याधुनिक असॉल्ट रायफल्स, नाइट व्हिजन उपकरणे, थर्मल इमेजर आणि पाळत ठेवणारे ड्रोन यांसारखी आधुनिक शस्त्रास्त्रे आहेत. शत्रूचा अचूक ठिकाणा शोधून तातडीने हल्ला करणे, घुसखोरी रोखणे, तसेच तोफखाना, पायदळ आणि हवाई तुकडीला मदत करणे ही त्यांची प्रमुख कामे असतील. वाळवंट, घनदाट जंगल आणि नियंत्रण रेषेवरील आव्हानात्मक भागात मोहिमा पार पाडण्यासाठी त्यांना कठोर प्रशिक्षण देण्यात आले आहे.
निवड आणि प्रशिक्षण
सामान्य नागरिकांना या तुकडीत थेट भरती मिळत नाही. लष्करातील विविध रेजिमेंटमधील शारीरिकदृष्ट्या तंदुरुस्त आणि मानसिकदृष्ट्या कणखर जवानांची या विशेष तुकडीसाठी निवड केली जाते. लांब पल्ल्याची धाव, जड ओझे घेऊन मोठा पल्ला गाठणे, अडथळ्यांची शर्यत आणि अत्यंत कठीण वातावरणात निर्णय घेण्याची क्षमता या निकषांवर निवड होते. निवडीनंतर जवानांना दोन ते तीन महिन्यांचे खडतर प्रशिक्षण दिले जाते. त्यात आधुनिक शस्त्रांचे प्रशिक्षण, ड्रोनचे प्रशिक्षण आणि युद्धनीतीचा अभ्यास समाविष्ट असतो.
प्रत्येक सामरिक कारवाईसाठी पॅरा विशेष दलावर अवलंबून राहण्याची गरज या तुकडीमुळे कमी होईल. तातडीच्या मोहिमा जलदगतीने पूर्ण करता येतील आणि पॅरा दल तसेच एनएसजी कमांडोंवरील भारही हलका होईल.
Leave a Reply