जळगाव जिल्ह्यातील यावल तालुक्यात अवैध व्यवसायांचा प्रश्न दिवसेंदिवस गंभीर होत असल्याची चर्चा परिसरात सुरू आहे. फैजपूर पोलीस ठाण्याच्या हद्दीत अवैध सावकारी, देशी दारू आणि पन्नी दारूची विक्री, सट्टा-पत्ता तसेच रात्रीच्या वेळी सुरू असलेली अवैध वाळू वाहतूक अशा प्रकारांमुळे सर्वसामान्य नागरिक त्रस्त असल्याच्या तक्रारी समोर येत आहेत. या सर्व प्रकारांवर पोलीस प्रशासन नेमकी कोणती भूमिका घेणार, असा सवाल आता नागरिकांकडून उपस्थित केला जात आहे.
अवैध दारूविक्रीमुळे तरुण पिढीची चिंता
फैजपूर पोलीस ठाण्याच्या हद्दीत देशी दारू आणि पन्नी दारूची अवैध विक्री होत असल्याच्या तक्रारी नागरिकांकडून केल्या जात आहेत. अशा विक्रीमुळे तरुण पिढी व्यसनाच्या आहारी जाण्याची भीती व्यक्त होत आहे. अनेक कुटुंबांमध्ये आर्थिक व कौटुंबिक समस्या निर्माण होण्यामागे व्यसनाधीनता हेही एक कारण ठरत आहे. त्यामुळे अवैध दारू विक्री करणाऱ्यांचा शोध घेऊन त्यांच्यावर कठोर कारवाई करण्याची गरज व्यक्त केली जात आहे.
सट्टा आणि अवैध सावकारीचा विळखा
परिसरात सट्टा-पत्ता आणि जुगाराचे प्रकार सुरू असल्याच्या चर्चेमुळे नागरिकांमध्ये चिंता व्यक्त केली जात आहे. अशा प्रकारांमुळे अनेक कुटुंबांचे आर्थिक नुकसान होण्याची शक्यता असते. तरुण वर्ग चुकीच्या मार्गाला लागण्यापूर्वी पोलीस प्रशासनाने विशेष पथक तयार करून संशयित ठिकाणांची तपासणी करावी, अशी मागणी होत आहे. त्याचबरोबर अवैध सावकारीच्या माध्यमातून गरजू नागरिकांची आर्थिक पिळवणूक होत असल्याच्या तक्रारींची चौकशी होणे गरजेचे असल्याचे नागरिकांचे म्हणणे आहे. आर्थिक अडचणीमुळे कर्ज घेणाऱ्या सामान्य नागरिकांना अवाजवी व्याजदर, धमक्या आणि मानसिक त्रासाला सामोरे जावे लागत असल्यास अशा सावकारांविरुद्ध कठोर कारवाई करणे आवश्यक आहे.
पोलीस प्रशासनाकडून कारवाईची प्रतीक्षा
एकीकडे कायदा व सुव्यवस्था राखण्याची जबाबदारी पोलीस प्रशासनावर आहे, तर दुसरीकडे नागरिकांना सुरक्षित वातावरण मिळणे ही प्रशासनाची प्राथमिक जबाबदारी आहे. मग फैजपूर पोलीस ठाण्याच्या हद्दीत अवैध व्यवसायांबाबत नागरिकांकडून तक्रारी होत असताना त्यावर प्रभावी कारवाई कधी होणार? अवैध धंदे चालविणाऱ्यांवर कोणाचा धाक आहे? या प्रकारांची वरिष्ठ पोलीस अधिकाऱ्यांकडून स्वतंत्र चौकशी होणार का? असे प्रश्न नागरिक उपस्थित करीत आहेत.
Leave a Reply