भारतीय क्रिकेट नियामक मंडळाने इंग्लंडविरुद्धच्या टी-२० मालिकेसाठी भारतीय अंडर-१९ महिला संघाची घोषणा केली आहे. या पाच सामन्यांच्या मालिकेत भारतीय संघाचे नेतृत्व भाविका अहिरे करणार असून, अनादी तगडे उपकर्णधार म्हणून जबाबदारी पाहणार आहे. २६ नोव्हेंबर ते ६ डिसेंबर दरम्यान गुजरातमध्ये ही मालिका खेळवली जाणार आहे. गुजरातच्या सुरत आणि वडोदरा येथे सामने होणार आहेत.
इंग्लंडविरुद्ध होणाऱ्या आगामी टी-२० मालिकेपूर्वी भारतीय अंडर-१९ महिला संघाने बंगळुरू येथील टी-२० मालिकेत आपली ताकद दाखवून दिली आहे. त्या मालिकेत भारत अ आणि भारत ब असे दोन संघ तयार करण्यात आले होते. दोन्ही भारतीय संघांनी तीन विजय मिळवले होते. त्यामुळे सध्या टीम इंडिया चांगल्या फॉर्ममध्ये आहे आणि इंग्लंडविरुद्ध मालिका जिंकण्याची शक्यता जास्त असल्याचे म्हटले जात आहे.
सामन्यांचे वेळापत्रक
या मालिकेतील पहिले दोन्ही सामने वडोदरा येथेच खेळवले जाणार आहेत. पहिला सामना संध्याकाळी ६ वाजता तर दुसरा सामना दुपारी १ वाजता सुरू होणार आहे. उर्वरित तीन टी-२० सामने सुरतमध्ये खेळवले जाणार आहेत. सुरत येथे होणाऱ्या सामन्यांपैकी तिसरा टी-२० सामना संध्याकाळी ६ वाजता, चौथा सामना देखील त्याच वेळेत होणार आहे. तर शेवटचा सामना ६ डिसेंबर रोजी दुपारी १ वाजता खेळवला जाणार आहे.
जानेवारी २०२७ मध्ये आयसीसी अंडर-१९ महिला टी-२० विश्वचषक होणार आहे. त्यादृष्टीने भारतीय संघासाठी ही मालिका महत्त्वाची समजली जात आहे. संघबांधणी करण्यासाठी ही मालिका भारताला फायदेशीर ठरणार आहे. भाविका अहिरेच्या नेतृत्वाखाली आणि अनादी तगडेच्या उपकर्णधारपदाखाली युवा भारतीय संघ इंग्लंडच्या आव्हानाला सामोरे जाण्यासाठी सज्ज झाला आहे.
१५ जणींचा संघ जाहीर
भारतीय अंडर-१९ संघात भाविका अहिरे (कर्णधार, यष्टिरक्षक), इरा जाधव, निधी महतो, पूर्वा सिवाच, महक नरवासे, मैत्री मनियार, ईश्वरी अवसरे, दिया यादव, श्रेया एस. चव्हाण, समायरा राघव, कुमारी पलक, उमा काशवी, अक्साह परमार, अनादी तगडे (उपकर्णधार) आणि पलक सिंग यांचा समावेश आहे.
Leave a Reply