१९९१ साली प्रदर्शित झालेल्या ‘लम्हे’ या चित्रपटातील ‘मोरनी बागा मा बोले’ हे गाणं प्रदर्शित होऊन ३५ वर्षं पूर्ण झाली आहेत. तरीही आजच्या पिढीच्या ओठांवरही हे गाणं तितकंच ताजं आहे. लग्नसमारंभ असो की सांस्कृतिक कार्यक्रम, या गाण्याच्या तालावर पावलं थिरकतातच. तीन दशकांहून अधिक काळ लोटला तरी या गाण्याची लोकप्रियता किंचितही कमी झालेली नाही.
लता-इला यांच्या आवाजाची जादू
या गाण्याला लता मंगेशकर आणि इला अरुण यांच्या आवाजाची साथ लाभली आहे. राजस्थानी लोकसंगीताची झलक असलेलं हे गाणं आनंद बक्षी यांनी लिहिलं आहे. लोकसंगीताचा बाज, त्यातलं ठेक्याचं वैशिष्ट्य आणि दोन्ही गायिकांच्या आवाजातील वेगळेपण यामुळे हे गाणं प्रदर्शित झाल्यापासूनच संगीतप्रेमींच्या पसंतीस उतरलं. आजही ते ऐकलं की त्या काळातील चित्रपटसंगीताची आठवण ताजी होते.
श्रीदेवीच्या नृत्याची वेगळी ओळख
या गाण्याला श्रीदेवीच्या नृत्यामुळे वेगळी ओळख मिळाली. तिच्या अदा आणि नृत्यातील सहजता यामुळे हे गाणं केवळ ऐकण्यापुरतं न राहता पाहण्याचाही आनंद देणारं ठरलं. यश चोप्रा यांनी दिग्दर्शित केलेल्या ‘लम्हे’ या चित्रपटातील हे गाणं आजही अनेकांच्या आवडत्या गाण्यांच्या यादीत वरच्या स्थानावर आहे. ३५ वर्षांनंतरही त्याचं आकर्षण कायम असणं हेच त्याच्या यशाचं खरं मोजमाप आहे.
Leave a Reply