जळगावच्या सराफा बाजारात सोन्या-चांदीच्या दरात विक्रमी घसरण नोंदवली गेली आहे. सोन्याच्या दरात सहा हजार रुपयांची घसरण झाली असून, चांदीच्या दरात दहा हजार रुपयांपर्यंतची मोठी घट पाहायला मिळत आहे. या घसरणीमुळे सोन्याचे दर जीएसटीसह १ लाख २८ हजार ५०० रुपयांपर्यंत पोहोचले आहेत. लग्नसराईच्या काळात खरेदी करणाऱ्या ग्राहकांना यामुळे मोठा दिलासा मिळाला आहे.
आठवड्याभरात सोन्यात नऊ टक्के घट
गेल्या काही दिवसांपासून सोन्या-चांदीच्या दरात सातत्याने घसरण सुरू आहे. या आठवड्यात सोन्यामध्ये जवळपास नऊ टक्के, तर चांदीत तेरा टक्क्यांपेक्षाही जास्त घसरण नोंदवली गेली आहे. आंतरराष्ट्रीय बाजारात सोने आणि चांदीच्या किंमती सप्टेंबर २०२५ नंतरच्या सर्वात नीचांकी पातळीवर पोहोचल्या आहेत. आंतरराष्ट्रीय बाजारात झालेल्या बदलांमुळे भारतीय बाजारातही किंमती घसरल्या आहेत.
सध्या चांदी जीएसटीसह प्रति किलो १ लाख ५९ हजार ६५० रुपये आहे. किंमती सातत्याने कमी होत असल्यामुळे लग्नासाठी सोने-चांदी खरेदी करण्याचा बेत आखणाऱ्या ग्राहकांना यामुळे मोठा दिलासा मिळाला आहे. या घसरलेल्या दरांमुळे सोने-चांदीच्या खरेदीत तेजी येण्याची शक्यता आहे.
Leave a Reply