अकरावीच्या ऑनलाइन प्रवेश प्रक्रियेतून विविध कारणांमुळे वंचित राहिलेल्या विद्यार्थ्यांना प्रवेशाची आणखी एक संधी मिळावी, यासाठी खासदार भास्कर भगरे यांनी शालेय शिक्षणमंत्री दादा भुसे यांच्याकडे निवेदन दिले आहे. या विद्यार्थ्यांसाठी किमान एक विशेष प्रवेश फेरी राबवावी, अशी मागणी निवेदनात करण्यात आली आहे.
ग्रामीण भागातील विद्यार्थ्यांना अडचणी
मतदारसंघातील अनेक विद्यार्थी तांत्रिक आणि प्रशासकीय अडचणींमुळे ऑनलाइन प्रवेश प्रक्रियेतून वंचित राहिले आहेत. विशेषतः ग्रामीण आणि दुर्गम भागातील विद्यार्थ्यांना इंटरनेट जोडणीचा अभाव, तांत्रिक सुविधांची कमतरता तसेच ऑनलाइन प्रवेश प्रक्रियेबाबत पुरेशी माहिती उपलब्ध नसल्यामुळे अनेक अडचणींचा सामना करावा लागला. पालक आणि विद्यार्थ्यांकडून प्राप्त झालेल्या तक्रारींचाही निवेदनात उल्लेख करण्यात आला आहे.
शैक्षणिक वर्ष वाया जाऊ नये
शिक्षण हा प्रत्येक विद्यार्थ्याचा मूलभूत अधिकार असून केवळ तांत्रिक किंवा ऑनलाइन अडचणींमुळे ग्रामीण आणि आदिवासी भागातील विद्यार्थ्यांचे शैक्षणिक वर्ष वाया जाणे अन्यायकारक असल्याचे निवेदनात नमूद करण्यात आले आहे. सर्व बाबींचा सहानुभूतीपूर्वक विचार करून वंचित विद्यार्थ्यांसाठी तत्काळ किमान एक विशेष प्रवेश फेरी सुरू करावी, अशी मागणी करण्यात आली आहे. यापुढे प्रवेश प्रक्रियेत एखादा विद्यार्थी तांत्रिक कारणांमुळे वंचित राहिल्यास त्यास शासन जबाबदार राहील, याची जाणीव ठेवून योग्य ती कार्यवाही करावी, असेही निवेदनात स्पष्ट करण्यात आले आहे.
Leave a Reply