केंद्रीय राज्यमंत्री आणि रिपब्लिकन पार्टी ऑफ इंडिया (आठवले)चे अध्यक्ष रामदास आठवले यांनी महायुतीतील जागावाटपावरून आपली नाराजी उघडपणे व्यक्त केली आहे. मुंबईत झालेल्या पत्रकार परिषदेत त्यांनी सांगितले की, काँग्रेससोबत असताना रिपब्लिकन पक्षाला योग्य जागा मिळत होत्या, मात्र भाजपच्या काळात पक्षाकडे दुर्लक्ष होत आहे.
विधान परिषदेच्या जागांसाठी आग्रही
या पत्रकार परिषदेत आठवले यांनी विधान परिषदेच्या जागांचा मुद्दाही उपस्थित केला. रिपब्लिकन पक्षाला विधान परिषदेच्या काही जागा देण्यात याव्यात, अशी मागणी त्यांनी केली आहे. यापूर्वीही आठवले यांनी विधान परिषदेत पक्षाला किमान एक जागा मिळावी, अशी अपेक्षा व्यक्त केली होती.
शरद पवार यांच्यासोबत असताना रिपब्लिकन पक्षाला विधान परिषदेच्या सात जागा मिळाल्या होत्या. मात्र, २०१४ पासून भाजपसोबत असूनही एकही जागा मिळाली नसल्याची खंत त्यांनी यापूर्वी व्यक्त केली होती.
महायुतीतील नाराजी पुन्हा चर्चेत
आठवले हे सध्या केंद्र सरकारमध्ये सामाजिक न्याय आणि अधिकारिता राज्यमंत्री आहेत. मात्र, केंद्रात मंत्रिपद असूनही महाराष्ट्रातील रिपब्लिकन पक्षाच्या कार्यकर्त्यांना सत्तेत पुरेसा वाटा मिळत नसल्याचा मुद्दा ते सातत्याने मांडत आहेत. स्थानिक स्वराज्य संस्था, विधान परिषद आणि विविध शासकीय पदांवर पक्षाला संधी मिळावी, अशी त्यांची मागणी आहे.
महायुतीमध्ये रिपब्लिकन पक्षालाही योग्य प्रतिनिधित्व मिळायला हवे आणि आमच्या पक्षाकडेही लक्ष दिले पाहिजे, अशी अपेक्षा आठवले यांनी व्यक्त केली. महायुतीतील मोठ्या पक्षांनी रिपब्लिकन पक्षाच्या मागण्यांचा गांभीर्याने विचार करावा, असेही त्यांचे म्हणणे आहे. आता आठवलेंनी पुन्हा एकदा उघडपणे नाराजी व्यक्त केल्याने महायुतीतील जागावाटपाचा प्रश्न चर्चेत आला आहे. भाजप आणि महायुतीतील इतर मित्रपक्ष आठवलेंच्या मागणीवर काय भूमिका घेतात, हे पाहणं महत्त्वाचं ठरणार आहे.
Leave a Reply