मागील सात वर्षांपासून एक दिवसाआड पाणीपुरवठा आणि १६ ऑक्टोबरपासून लागू झालेल्या दहा टक्के पाणी कपातीचा सामना करणाऱ्या पिंपरी-चिंचवडकरांना नव्या वर्षात दिलासा मिळण्याची शक्यता आहे. भामा आसखेड धरणातून शहराला अतिरिक्त १६७ दशलक्ष लिटर (एमएलडी) पाणी मार्च २०२७ मध्ये उपलब्ध होणार आहे. या योजनेचे काम जानेवारीअखेर पूर्ण करण्याचे नियोजन महापालिका प्रशासनाने केले आहे. त्यानंतर फेब्रुवारीमध्ये पाण्याची चाचणी घेऊन मार्चपासून प्रत्यक्ष पाणीपुरवठा सुरू करण्यात येणार आहे.
पिंपरी-चिंचवड शहराची लोकसंख्या झपाट्याने वाढत असून, त्याचबरोबर पाण्याची मागणीही वाढत आहे. मात्र, उपलब्ध पाणीसाठा आणि वाढती मागणी यांचा ताळमेळ घालताना महापालिका प्रशासनाची दमछाक होत आहे. शहरातील अनेक भागांत अपुरा आणि अनियमित पाणीपुरवठा होत असल्याने नागरिकांना गैरसोयीचा सामना करावा लागत आहे. एक दिवसाआड पाणीपुरवठा आणि त्यातच दहा टक्के कपात यामुळे नागरिकांच्या अडचणींत भर पडली आहे.
बंदिस्त जलवाहिनीद्वारे पाणी येणार
या पार्श्वभूमीवर खेड तालुक्यातील भामा आसखेड धरणातून मिळणाऱ्या अतिरिक्त पाण्याकडे शहरवासीयांचे लक्ष लागले आहे. या योजनेअंतर्गत बंदिस्त जलवाहिनीद्वारे १६७ एमएलडी पाणी चिखली येथील जलशुद्धीकरण केंद्रात आणण्यात येणार आहे. हे पाणी उपलब्ध झाल्यानंतर शहराच्या एकूण पाणीपुरवठ्यात वाढ होऊन सध्याच्या व्यवस्थेवरील ताण कमी होण्यास मदत होणार आहे.
सध्या दहा टक्के पाणी कपातीनंतर शहराला पवना धरणातून ५२० एमएलडी, आंद्रा धरणातून ९० एमएलडी आणि एमआयडीसीकडून २५ एमएलडी असे एकूण ६३५ एमएलडी पाणी मिळत आहे. त्यात भामा आसखेडचे १६७ एमएलडी पाणी उपलब्ध झाल्यास शहराच्या पाणीपुरवठ्याला मोठा आधार मिळणार आहे.
नवीन ठेकेदाराकडून कामाला वेग
दरम्यान, भामा आसखेड पाणी योजनेचे काम रखडल्याने नवीन ठेकेदाराची नियुक्ती करण्यात आली असून, त्यानंतर कामाला वेग आला आहे. कामाचा सातत्याने आढावा घेतला जात आहे. जानेवारी २०२७ अखेरपर्यंत काम पूर्ण करून फेब्रुवारीमध्ये पाण्याची चाचणी घेण्यात येईल. मार्चमध्ये शहराला प्रत्यक्ष वाढीव १६७ एमएलडी पाणी उपलब्ध होईल, असे महापालिकेचे सहशहर अभियंता अजय सूर्यवंशी यांनी सांगितले.
Leave a Reply