देशातील फर्निचर क्षेत्रातील एका आघाडीच्या कंपनीने पुढील पाच वर्षांसाठी मोठा विकास आराखडा जाहीर केला आहे. गीकेन सीटिंग कलेक्शन प्रायव्हेट लिमिटेडने २०३० पर्यंत वार्षिक ३,००० कोटी रुपयांचे उत्पन्न गाठण्याचे उद्दिष्ट ठेवले आहे. संस्थात्मक व्यवसायाच्या भक्कम पायावर उभ्या असलेल्या या कंपनीला आता घरगुती फर्निचरच्या बाजारपेठेतही आपली उपस्थिती वाढवायची आहे.
या उद्दिष्टासाठी कंपनी उत्पादन क्षमता वाढवणे, आधुनिक तंत्रज्ञानाचा वापर, रोबोटिक उत्पादन प्रक्रिया आणि ऑटोमेशन यावर ३५० कोटी रुपयांची गुंतवणूक करणार आहे. ही गुंतवणूक संस्थात्मक, कॉर्पोरेट आणि घरगुती अशा तिन्ही विभागांतील वाढत्या मागणीची पूर्तता करण्यासाठी उपयोगी पडेल, असे कंपनीचे म्हणणे आहे.
तीन दशकांचा अनुभव, १,१०० हून अधिक डिझाइन्स
गीकेन फर्निचरला या क्षेत्रात जवळपास तीन दशकांचा अनुभव आहे. संस्थात्मक फर्निचर हे कंपनीच्या व्यवसायाचे मुख्य आधारस्तंभ राहिले आहे. कंपनीने आतापर्यंत ३५,००० हून अधिक प्रकल्प पूर्ण केले असून दोन लाखांपेक्षा अधिक ग्राहकांना सेवा दिली आहे. फर्निचरच्या विविध श्रेणींमध्ये कंपनीकडे १,१०० हून अधिक डिझाइन्सचा पोर्टफोलिओ आहे. तिचे कामकाज सुमारे सात लाख चौरस फुटांमध्ये विस्तारलेल्या सहा उत्पादन केंद्रांमधून चालते.
विकास आराखड्याचा भाग म्हणून कंपनी विद्यमान बाजारपेठांमधील उपस्थिती अधिक मजबूत करणे, वितरण जाळे विस्तारणे आणि ग्राहकांशी असलेले संबंध अधिक दृढ करण्यावरही भर देणार आहे.
ग्राहकांसाठी थेट सेवा, २०० दालने उघडणार
घरगुती फर्निचरच्या बाजारपेठेत प्रवेश वाढवण्यासाठी कंपनी ऑनलाइन माध्यमातून कार्यालयीन आणि घरगुती फर्निचरची विशेष श्रेणी सादर करणार आहे. २०३० पर्यंत ई-कॉमर्सचा कंपनीच्या एकूण उत्पन्नात सात ते आठ टक्के वाटा असण्याची अपेक्षा आहे. त्याचबरोबर २०३० पर्यंत देशभरात गीकेन होमची २०० विशेष विक्री दालने सुरू करण्याचे उद्दिष्ट ठेवण्यात आले आहे. या विस्तारामुळे ग्राहकांपर्यंत ब्रँडची थेट पोहोच अधिक मजबूत होईल आणि निवासी फर्निचर श्रेणीतील उत्पादने अधिक सहजपणे उपलब्ध होतील.
कंपनीचे व्यवस्थापकीय संचालक साहिल मंगला यांनी सांगितले की, संस्थात्मक आणि कॉर्पोरेट व्यवसाय हा विकासाचा पाया राहिला आहे आणि तो अधिक मजबूत करणे हे प्रमुख प्राधान्य राहील. त्याचवेळी घरगुती फर्निचरच्या बाजारपेठेतही मोठ्या संधी दिसत असल्याचे त्यांनी नमूद केले. उत्पादन आणि प्रकल्प अंमलबजावणीतील अनुभवाच्या आधारावर अधिकाधिक ग्राहकांपर्यंत पोहोचणे, विकासाच्या नवीन संधी निर्माण करणे आणि ग्राहकांच्या बदलत्या गरजा पूर्ण करणे यावर कंपनीचा भर असणार आहे.
Leave a Reply