मंगळवार, १७ नोव्हेंबर २०२६ ▶
वेगवान महाराष्ट्र महाराष्ट्राच्या ताज्या बातम्या

मृद्गंध पुरस्कार २०२६: अमृता सुभाष, संदेश कुलकर्णींचा गौरव

विठ्ठल उमप स्मृतिदिनी २६ नोव्हेंबरला ठाण्यात मृद्गंध पुरस्कार २०२६ दिले जाणार आहेत. सुरेश तळवलकर यांना जीवनगौरव, अमृता सुभाष व संदेश कुलकर्णी यांचा गौरव.

मृद्गंध पुरस्कार २०२६: अमृता सुभाष, संदेश कुलकर्णींचा गौरव

महाराष्ट्राच्या लोककलेला नवी ओळख मिळवून देणारे लोकशाहीर विठ्ठल उमप यांचा समृद्ध कलावारसा आजही अनेकांना प्रेरणा देत आहे. भारूड, गोंधळ आणि पोवाड्यांच्या माध्यमातून त्यांनी लोककलेला मनोरंजनासोबतच जनजागृतीचे प्रभावी व्यासपीठ मिळवून दिले. त्यांच्या याच कलाप्रवासाला अभिवादन करण्यासाठी पुन्हा एकदा सुरांची मैफल सजणार आहे. लोकशाहीर विठ्ठल उमप यांच्या १६व्या स्मृतिदिनानिमित्त १६व्या लोकशाहीर विठ्ठल उमप स्मृती संगीत समारोहाचे आयोजन करण्यात आले आहे. याच सोहळ्यात विठ्ठल उमप फाऊंडेशनतर्फे मृद्गंध पुरस्कार २०२६ प्रदान केले जाणार आहेत.

गुरुवार, २६ नोव्हेंबर रोजी सायंकाळी ६ वाजता ठाण्यातील राम गणेश गडकरी रंगायतन येथे हा सांगीतिक आणि सांस्कृतिक सोहळा रंगणार आहे. या कार्यक्रमाला रसिकांसाठी विनामूल्य प्रवेश असणार आहे.

पुरस्कारार्थींची यादी

कला क्षेत्रातील विविध मान्यवरांच्या योगदानाचा गौरव करण्यासाठी विठ्ठल उमप फाऊंडेशनतर्फे दरवर्षी मृद्गंध पुरस्कार प्रदान केला जातो. यंदा पद्मश्री तालयोगी श्री सुरेश तळवलकर यांना जीवनगौरव पुरस्काराने सन्मानित करण्यात येणार आहे. लोककला क्षेत्रातील योगदानासाठी पद्मश्री भिकल्या लाडक्या धिंडा, छायाचित्रण आणि पत्रकारितेसाठी पद्मश्री सुधारक ओळवे, अभिनय व दिग्दर्शनासाठी संदेश कुलकर्णी, अभिनय क्षेत्रासाठी अभिनेत्री अमृता सुभाष आणि नवोन्मेष प्रतिभा-गायक या विभागात चैतन्य देवडे (माऊली) यांना पुरस्कार प्रदान केला जाणार आहे. शाल, पुष्पगुच्छ, मानपत्र आणि लोकशाहीर विठ्ठल उमप यांची प्रतिकृती असलेले आकर्षक मानचिन्ह असे या पुरस्काराचे स्वरूप आहे.

सांगीतिक मानवंदना आणि उपस्थित मान्यवर

या समारोहात पार्श्वगायिका प्रियांका बर्वे, अरुण पेदे वेसावकर आणि त्यांचे सहकारी आपल्या कलाविष्कारातून लोकशाहीर विठ्ठल उमप यांना सांगीतिक मानवंदना अर्पण करणार आहेत. या सोहळ्याला उपमुख्यमंत्री एकनाथ शिंदे, सांस्कृतिक कार्यमंत्री आशिष शेलार, आमदार जितेंद्र आव्हाड, खासदार नरेश म्हस्के, ठाण्याचे आमदार संजय केळकर, आमदार निरंजन डावखरे आणि आरपीआय नेते नानासाहेब इंदिसे यांच्यासह अनेक मान्यवर उपस्थित राहणार आहेत. अभिनेत्री डॉ. समीरा गुजर या कार्यक्रमाचे सूत्रसंचालन करणार आहेत.

लोकशाहीर विठ्ठल उमप यांचे चिरंजीव, प्रसिद्ध गायक आणि विठ्ठल उमप फाऊंडेशनचे अध्यक्ष नंदेश उमप यांनी सांगितले की, लोककला ही महाराष्ट्राच्या संस्कृतीची खरी ओळख आहे. बाबांचा लोककलेचा वारसा जपतानाच नव्या पिढीपर्यंत पोहोचवणे, कलाकारांना व्यासपीठ उपलब्ध करून देणे आणि समाजाप्रती आपली जबाबदारी पार पाडणे, हेच फाऊंडेशनचे ध्येय आहे. याच भावनेतून यंदा फाऊंडेशनतर्फे दुष्काळग्रस्त शेतकऱ्यांना मदतीचा हात दिला जाणार असल्याचेही त्यांनी सांगितले. त्यामुळे २६ नोव्हेंबरचा हा सोहळा केवळ स्मृतिदिनापुरता मर्यादित न राहता महाराष्ट्राच्या लोककलेचा उत्सव आणि एका अजरामर कलावंताला सुरांच्या माध्यमातून वाहिलेली आदरांजली ठरणार आहे.

अभी जाधव

Similar Posts

View All

Leave a Reply

Your email address will not be published. Required fields are marked *

ही वेबसाइट AI सहाय्याने व्यवस्थापित केली जाते · This website is managed with AI assistance