ज्येष्ठ अभिनेते अशोक सराफ यांच्यासोबत काम करतानाचा एक मजेशीर आणि अविस्मरणीय किस्सा अभिनेता संकर्षण कऱ्हाडे याने नुकत्याच एका मुलाखतीत सांगितला आहे. चित्रपटाच्या चित्रीकरणादरम्यान एका प्रसंगात अशोक सराफ आणि संकर्षण यांना स्कूटीवर बसायचे होते. मात्र सराफ यांनी धोतर नेसलेले असल्यामुळे स्कूटीवर मागे बसताना अडचण निर्माण झाली.
धोतरामुळे स्कूटीवर बसताना उडाला गोंधळ
धोतर नेसलेले असल्यामुळे स्कूटीवर मागे बसताना धोतर अडकण्याची शक्यता होती. स्कूटीचा मागचा भाग उंच असल्याने धोतर इंडिकेटर किंवा इतर भागात अडकू शकते, अशी भीती होती. त्यावेळी अशोक सराफ यांनीच धोतर नेसून कसे बसायचे, असा प्रश्न उपस्थित केला. सेटवरील सगळेच विचारात पडले की आता काय करायचे.
मात्र अशोक सराफ यांनी स्वतःच यावर भन्नाट युक्ती शोधून काढली. त्यांनी स्कूटी स्टँडवर लावायला सांगितली. त्यानंतर आधी स्कूटीच्या पुढच्या बाजूला बसून हळूहळू मागे सरकण्याचा मार्ग त्यांनी निवडला. त्यांची ही अनोखी पद्धत पाहून सेटवरील सगळेच आश्चर्यचकित झाले.
आदि अनंत मध्ये दोघं एकत्र
हा प्रसंग सांगताना संकर्षणने अशोक सराफ यांच्या कामाप्रती असलेल्या समर्पणाचेही कौतुक केले. एखादा प्रसंग पूर्ण करण्यासाठी ते ज्या पद्धतीने मार्ग शोधतात, त्यांची ती धडपड कलाकारांना खूप काही शिकवणारी असल्याचे त्याने सांगितले. अशोक सराफ हे कमी बोलूनही आपल्या मायेने माणसांना आपलंसं करणारे व्यक्तिमत्त्व असल्याचेही संकर्षण म्हणाला. त्यांच्यासोबत चार पावलं चालण्याची संधी मिळाली तरी ती आयुष्यभर सांगण्यासारखी असल्याची भावना त्याने व्यक्त केली.
अभिनेते अशोक सराफ आणि अभिनेता संकर्षण कऱ्हाडे हे दोघे सध्या आदि अनंत या मराठी चित्रपटाच्या निमित्ताने एकत्र आले आहेत. या चित्रपटाच्या माध्यमातून संकर्षण कऱ्हाडेने पहिल्यांदाच चित्रपटाचे लेखन केले असून, त्याला अशोक सराफ यांच्यासारख्या ज्येष्ठ कलाकारासोबत अभिनय करण्याची संधी मिळाली आहे. महेश लिमये यांनी या चित्रपटाचे दिग्दर्शन केले आहे. या चित्रपटात अशोक सराफ आजोबांच्या, तर संकर्षण कऱ्हाडे नातवाच्या भूमिकेत दिसत आहेत. सखी गोखले, वैदेही परशुरामी आणि कविता लाड यांच्याही महत्त्वपूर्ण भूमिका आहेत. विनामूल्य मिळालेली नाती फार मोलाची असतात अशी या चित्रपटाची टॅगलाइन आहे. १२ नोव्हेंबर २०२६ रोजी हा चित्रपट चित्रपटगृहांमध्ये प्रदर्शित झाला आहे.
Leave a Reply