दिवाळीच्या सणामुळे जळगाव शहरात कचऱ्याचे प्रमाण लक्षणीय वाढले आहे. सणापूर्वी शहरात दररोज १५० ते १८० टन कचरा संकलित होत होता. दिवाळीच्या काळात या प्रमाणात दररोज सुमारे ७० ते ८० टनांनी वाढ झाल्याचे महापालिकेच्या आरोग्य विभागाच्या आकडेवारीतून दिसून येत आहे. घरोघरी साफसफाई, फराळाची तयारी, खरेदी आणि व्यावसायिक उलाढाल यामुळे कचऱ्याचे प्रमाण वाढले.
वाढीव कचऱ्याचे संकलन करण्यासाठी स्वच्छतेचा ठेका घेतलेल्या बीव्हीजी कंपनीकडून ट्रॅक्टरची संख्या ५ ते ७ वरून थेट २८ पर्यंत वाढविण्यात आली आहे. त्यामुळे शहरातील कचरा संकलन आणि स्वच्छतेच्या कामाला गती मिळाली आहे. महापालिकेच्या आरोग्य विभागातील कर्मचारी आणि ठेकेदार कंपनीच्या माध्यमातून कचरा संकलनाचे काम सुरू ठेवण्यात आले असून, वाढलेल्या कचऱ्याची विल्हेवाट लावण्यासाठी यंत्रणा अधिक सक्रिय झाली आहे.
व्यापारी संकुलांत मात्र ढीग कायम
एकीकडे शहरातील कचरा संकलनासाठी यंत्रणा वाढविण्यात आली असताना दुसरीकडे महापालिकेच्या व्यापारी संकुलांमध्ये मात्र कचऱ्याचे ढीग पुन्हा साचू लागले आहेत. दोन महिन्यांपूर्वी महापालिकेने दर रविवारी व्यापारी संकुलांची विशेष स्वच्छता मोहीम सुरू केली होती. काही संकुलांची स्वच्छता केल्यानंतर ही मोहीमच थंडावली. परिणामी महात्मा फुले मार्केट आणि गोलाणी मार्केटसह अन्य संकुलांमध्ये पुन्हा अस्वच्छतेची समस्या निर्माण झाली आहे. गोलाणी संकुलातील दुसऱ्या मजल्यावर कचऱ्याचा मोठा ढीग साचल्याचे दिसून आले आहे.
महापौर दीपमाला काळे आणि आयुक्त आदित्य जिवने यांनी व्यापारी संकुलांची पाहणी करून दुकानाबाहेर कचरा टाकणाऱ्या तसेच दुकानात डस्टबीन न ठेवणाऱ्या व्यावसायिकांवर दंडात्मक कारवाई करण्याचे निर्देश दिले होते. सुरुवातीला काही मोजक्या व्यावसायिकांवर कारवाई झाली; मात्र त्यानंतर ही मोहीमही थंडावली. त्यामुळे व्यापारी संकुलांमधील अस्वच्छतेचा प्रश्न पुन्हा ऐरणीवर आला आहे. शहरातील नियमित स्वच्छतेसोबतच व्यापारी संकुलांची विशेष स्वच्छता मोहीम सातत्याने राबविणे आणि नियम मोडणाऱ्यांवर नियमित दंडात्मक कारवाई करणे, हे महापालिकेसमोर आता महत्त्वाचे काम ठरणार आहे.
Leave a Reply