धुळे शहरातील देवपूर भागात असलेल्या मनकर्णिका भवन येथे गुणवंत विद्यार्थ्यांचा गौरव सोहळा उत्साहात पार पडला. श्री शुक्ल यजुर्वेदीय गोवर्धन ब्राह्मण मंडळाच्या वतीने या कार्यक्रमाचे आयोजन करण्यात आले होते. रविवारी झालेल्या या सोहळ्यात शैक्षणिक क्षेत्रात उल्लेखनीय यश मिळवणाऱ्या विद्यार्थ्यांचा सन्मान करण्यात आला.
ज्येष्ठांच्या मार्गदर्शनाचे महत्त्व
महावितरणचे उपविभागीय अधिकारी सचिन जोशी हे या कार्यक्रमाचे प्रमुख पाहुणे होते. मुलांवर उत्तम संस्कार घडवण्यासाठी आणि त्यांना योग्य व शिस्तबद्ध मार्ग दाखवण्यासाठी घरामध्ये मोठ्यांचा दरारा असणे गरजेचे असल्याचे त्यांनी सांगितले. सध्या काळ वेगाने बदलत असून घरातील मोठ्या व्यक्तींचा धाक दिवसेंदिवस कमी होताना दिसत असल्याची खंत त्यांनी व्यक्त केली.
जीवनात खऱ्या अर्थाने मोठे होण्यासाठी महान व्यक्तींचे वेळोवेळी मार्गदर्शन घेणे आणि त्यांची प्रेरणादायी व्याख्याने ऐकणे आवश्यक असल्याचे जोशी यांनी नमूद केले. यातूनच विद्यार्थ्यांची प्रगती साधली जाते, असेही ते म्हणाले.
समाजाने एकसंघ राहावे
मंडळाचे अध्यक्ष ॲड. आर. डी. जोशी हे कार्यक्रमाच्या अध्यक्षस्थानी होते. जवाहर मेडिकल फाउंडेशनचे अधिष्ठाता डॉ. नितीन कुलकर्णी यांची प्रमुख पाहुणे म्हणून विशेष उपस्थिती होती. समाजाच्या विकासासाठी सातत्यपूर्ण संवाद, अभ्यासात सातत्य आणि कृतज्ञता बाळगण्याबाबत डॉ. कुलकर्णी यांनी मार्गदर्शन केले. समाजबांधवांच्या सतत बैठका झाल्या पाहिजेत, जेणेकरून विचारांची देवाणघेवाण होऊन संपूर्ण समाजाला लाभ होईल, असेही त्यांनी सांगितले.
ॲड. जोशी यांनी विद्यार्थ्यांना योग्य दिशा मिळण्याची नितांत गरज असल्याचे सांगितले. समाजाने एकसंघ राहून एकमेकांच्या पाठीशी उभे राहणे ही काळाची गरज असल्याचे त्यांनी नमूद केले. पालकांनी मुलांच्या सर्वांगीण विकासासाठी विशेष लक्ष द्यावे, असे आवाहनही त्यांनी केले. वसुधा पाठक आणि पपिता जोशी यांनी सूत्रसंचालन केले, विजय एन. पाठक यांनी प्रास्ताविक मांडले तर विनोद कुलकर्णी यांनी आभार मानले.
Leave a Reply