बीड ते पालवण या रस्त्यावर रात्रीच्या वेळी पथदिवे नसल्याने मोठा अंधार पसरतो. त्याचबरोबर या रस्त्यावर दुभाजक आणि गतिरोधकही नाहीत. त्यामुळे भरधाव वेगाने जाणाऱ्या वाहनांमुळे अपघात होण्याची शक्यता निर्माण झाली आहे. या रस्त्यावर तातडीने उपाययोजना कराव्यात, अशी मागणी प्रवासी आणि परिसरातील ग्रामस्थांकडून करण्यात येत आहे.
पालवण रस्ता हा पिंपळवाडीकडे जाणारा महत्त्वाचा मार्ग आहे. ग्रामीण भागातील नागरिक या रस्त्यावरून ये-जा करतात. मागील दोन महिन्यांपासून बीड रेल्वेस्थानक सुरू झाले आहे. रेल्वेस्थानकाकडे जाण्यासाठी पालवण रोड हाच मुख्य रस्ता आहे.
रेल्वेस्थानकामुळे वाढली वर्दळ
बीड येथून रेल्वे जाण्याच्या आणि येण्याच्या वेळेला या रस्त्यावर ऑटो, चारचाकी आणि दुचाकी वाहनांची मोठी वर्दळ असते. मात्र रस्त्याचे साईडपट्टे भरलेले नाहीत आणि दुभाजकही नाही. अशा स्थितीत वाहने एकमेकांना ओव्हरटेक करण्याच्या प्रयत्नात अपघात होत आहेत.
प्रशासनाकडे मागणी
रस्त्यावर पथदिवे बसवावेत, दुभाजक टाकावेत आणि गतिरोधकांची सोय करावी, अशी मागणी प्रवासी आणि ग्रामस्थांनी केली आहे. प्रशासनाने या रस्त्यावर तातडीने उपाययोजना करावी, अशी अपेक्षा व्यक्त होत आहे.
Leave a Reply