केंद्र सरकारच्या सेवेतील कर्मचारी आणि निवृत्तीवेतनधारकांसाठी आठव्या वेतन आयोगाबाबत महत्त्वाची माहिती समोर आली आहे. नवीन वेतन आयोग लागू झाल्यानंतर पगारात किती वाढ होईल, फिटमेंट फॅक्टर किती असेल आणि पेन्शनमध्ये काय बदल होतील, याकडे लाखो कर्मचाऱ्यांचे लक्ष लागले आहे. याच पार्श्वभूमीवर आयोगाच्या अधिकृत संकेतस्थळावर पाच महत्त्वाचे अपडेट प्रसिद्ध करण्यात आले आहेत. त्यामुळे आयोगाच्या पुढील कामकाजाबद्दलची उत्सुकता वाढली आहे.
मुंबई आणि बंगळुरूमध्ये कर्मचारी संघटनांशी चर्चा
आयोगाने २२ आणि २३ ऑक्टोबर २०२६ रोजी मुंबईत बैठका घेतल्या. या बैठकांमध्ये वेगवेगळ्या कर्मचारी संघटना आणि संबंधित प्रतिनिधींशी चर्चा करण्यात आली. वेतनवाढ, पेन्शन आणि कर्मचाऱ्यांच्या समस्यांबाबत त्यांची मते जाणून घेण्यात आली. त्याआधी आयोगाने ७ आणि ८ ऑक्टोबर २०२६ रोजी बंगळुरूचा दौरा केला होता. तिथेही कर्मचारी संघटनांना त्यांच्या मागण्या आणि सूचना मांडण्याची संधी देण्यात आली. यासाठी अर्ज करण्याची शेवटची तारीख १८ सप्टेंबर होती.
जयपूर आणि चंदीगडमध्येही बैठका; सल्लागार नियुक्तीत बदल
३१ ऑगस्ट आणि १ सप्टेंबर २०२६ रोजी जयपूरमध्ये बैठका घेण्यात आल्या. राजस्थानमधील कर्मचारी संघटनांकडून वेतन आणि पेन्शनविषयक सूचना जाणून घेण्यात आल्या. त्यानंतर १६ आणि १७ सप्टेंबर २०२६ रोजी चंदीगडमध्येही आयोगाने कर्मचारी प्रतिनिधींशी चर्चा केली. यावेळी पगारवाढ आणि पेन्शनसंबंधी मागण्या मांडण्याची संधी देण्यात आली. दरम्यान, ११ ऑगस्ट २०२६ रोजी आयोगाने सल्लागारांच्या नियुक्तीसंदर्भातील मार्गदर्शक सूचनांमध्ये बदल केले. अहवाल तयार करण्यासाठी आवश्यक तज्ज्ञांची मदत घेणे हा यामागचा उद्देश आहे. देशभरातील विविध शहरांमध्ये झालेल्या या चर्चांमधून कर्मचाऱ्यांच्या अपेक्षा आणि मागण्या आयोगापर्यंत पोहोचल्या आहेत. आता आयोगाच्या पुढील पावलांकडे सर्वांचे लक्ष लागले आहे.
Leave a Reply