दिवाळी संपताच लग्नसराईला सुरुवात होते. लग्न म्हटले की दाग-दागिन्यांची खरेदी असतेच. अशा वेळी सोने-चांदी खरेदी करणाऱ्यांसाठी दिलासादायक बातमी आहे. गेल्या काही दिवसांपासून सोने-चांदीच्या दरात मोठी घसरण पाहायला मिळत आहे. फक्त १० दिवसांत सोन्याचे दर हजारो रुपयांनी कमी झाले आहेत. चांदीच्या दरातही तब्बल १५ हजार रुपयांची घसरण झाली आहे. आज १५ नोव्हेंबर रोजी सोने-चांदीचे दर स्थिर आहेत.
१० दिवसांत सोने किती स्वस्त झाले
गेल्या १० दिवसांत २४ कॅरेट १० ग्रॅम सोने ८,६६० रुपयांनी स्वस्त झाले आहे. तर २२ कॅरेट सोने ७,९५० रुपयांनी घसरले आहे. १० ते १३ नोव्हेंबरच्या दरम्यान सलग चार दिवस सोन्याच्या दरात ही घसरण झाली.
आजचे शहरनिहाय दर
मुंबईत २४ कॅरेट १० ग्रॅम सोन्याचा भाव १ लाख ३७ हजार ६२० रुपये, २२ कॅरेटचा भाव १ लाख २६ हजार १५० रुपये आणि १८ कॅरेटचा भाव १ लाख ३ हजार २२० रुपये आहे. दिल्लीत २४ कॅरेट सोन्याचा भाव १ लाख ३७ हजार ७७० रुपये, २२ कॅरेटचा भाव १ लाख २६ हजार ३०० रुपये आणि १८ कॅरेटचा भाव १ लाख ३ हजार ३७० रुपये आहे. कोलकात्यातील दर मुंबईसारखेच आहेत. चेन्नईत २४ कॅरेटचा भाव १ लाख ३७ हजार ६२० रुपये, २२ कॅरेटचा भाव १ लाख २६ हजार १५० रुपये आणि १८ कॅरेटचा भाव १ लाख ३ हजार ३०० रुपये आहे.
सोन्यासोबत चांदीच्या किंमतीतही मोठी घसरण झाली आहे. गेल्या १० दिवसांत एक किलो चांदी तब्बल १५ हजार रुपयांनी स्वस्त झाली आहे. ६, ११ आणि १३ नोव्हेंबर रोजी प्रत्येक वेळी चांदीच्या किंमतीत ५ हजार रुपयांची घसरण झाली. सध्या मुंबई, चेन्नई आणि दिल्ली या शहरांमध्ये एक किलो चांदीचा भाव १ लाख ९५ हजार रुपये आहे.
Leave a Reply