क्रांतिसूर्य भगवान बिरसा मुंडा यांच्या १५१ व्या जयंतीनिमित्त नंदुरबारमध्ये जनजाती गौरव दिन सोहळा पार पडला. जिल्हाधिकारी कार्यालयातील नियोजन सभागृहात रविवारी झालेल्या या सोहळ्यात पालकमंत्री हसन मुश्रीफ यांनी बिरसा मुंडा यांच्या कार्याचे स्मरण केले. आदिवासी समाजाच्या हक्कांसाठी त्यांनी केलेला संघर्ष आणि दिलेले बलिदान आजही सर्वांसाठी प्रेरणादायी आहे, असे ते यावेळी म्हणाले. या कार्यक्रमाला आमदार आमश्या पाडवी, जिल्हाधिकारी डॉ. मिताली सेठी, जिल्हा परिषदेचे मुख्य कार्यकारी अधिकारी नमन गोयल, प्रकल्प अधिकारी लघिमा तिवारी, पोलिस अधीक्षक अश्विनी सानप, अपर जिल्हाधिकारी धनंजय गोगटे, निवासी उपजिल्हाधिकारी आशा संघवी, प्रकल्प अधिकारी चंद्रकांत पाटील, प्रशिक्षणार्थी जिल्हाधिकारी पंकज पटले, माजी खासदार डॉ. हीना गावित, जिल्हा परिषदेच्या माजी अध्यक्ष डॉ. सुप्रिया गावित, सामाजिक कार्यकर्त्या प्रतिभा शिंदे आणि अभिजित मोरे उपस्थित होते. उपस्थित मान्यवरांनी पंतप्रधान नरेंद्र मोदी यांच्या संबोधनास ऑनलाइन उपस्थिती दिली.
उलगुलान उठावाची प्रेरणा
ब्रिटिश राजवटीत आदिवासींच्या जमिनी हिरावून घेतल्या जात होत्या आणि सावकार तसेच जमीनदारांकडून त्यांचे आर्थिक शोषण होत होते. या अन्यायाविरुद्ध धरती आबा भगवान बिरसा मुंडा यांनी उलगुलान उठाव केला. आदिवासींचे जल, जंगल आणि जमिनीवरील पारंपरिक अधिकार सुरक्षित ठेवण्यासाठी त्यांनी ब्रिटिश राजवटीला आव्हान दिले. त्यांच्या कार्याचा गौरव करण्यासाठी भारत सरकारने १५ नोव्हेंबर हा दिवस जनजाती गौरव दिन म्हणून साजरा करण्याचा निर्णय घेतला आहे. डॉ. हीना गावित यांनी जनजाती गौरव दिन आदिवासी समाजाच्या गौरवासाठी महत्त्वपूर्ण असल्याचे सांगितले. वनहक्क पट्टेधारकांना सातबारा उतारा देण्याचा शासनाचा निर्णय आदिवासी बांधवांसाठी दिलासादायक असल्याचे त्यांनी नमूद केले.
लाभार्थ्यांना अर्थसहाय्य वाटप
सोहळ्यादरम्यान पालकमंत्र्यांच्या हस्ते तळोदा प्रकल्प कार्यालयाच्या डिजिटल इन्फॉर्मेशन वनसंपदा पोर्टलचे अनावरण करण्यात आले. यावेळी अनुसूचित जमातीच्या शेतकऱ्यांना शेती साहित्य अर्थसहाय्य, व्यवसायासाठी अर्थसहाय्य, ठिंबक सिंचन अर्थसहाय्य, राणी दुर्गावती आदिवासी महिला सक्षमीकरण योजनेंतर्गत कर्ज सहाय्य, शिलाई मशिन, महिला बचत गटांना प्रतिगट दहा हजार रुपये अर्थसहाय्य, वैदू प्रमाणपत्र, सातबारा आणि बारा प्रमाणपत्रांचे वाटप, वनपट्टे, महिला शेतकरी प्रमाणपत्रे देण्यात आली. तसेच शासकीय व अनुदानित आश्रमशाळांमधील नऊ मुख्याध्यापक आणि तीन शिक्षकांना प्रमाणपत्र देऊन गौरवण्यात आले.
६५ कोटींच्या इमारतींचे लोकार्पण
बिरसा मुंडा यांच्या जयंतीनिमित्त गडचिरोली येथे आयोजित जनजातीय गौरव दिन कार्यक्रमात पंतप्रधान नरेंद्र मोदी यांच्या हस्ते आणि मुख्यमंत्री देवेंद्र फडणवीस यांच्या उपस्थितीत तळोदा आदिवासी विकास प्रकल्पांतर्गत उभारलेल्या ६५ कोटी रुपये खर्चाच्या सात शासकीय इमारतींचे ऑनलाइन लोकार्पण करण्यात आले. यामध्ये इच्छागव्हाण येथील शासकीय आदिवासी आश्रमशाळा, मुलांचे आणि मुलींचे वसतिगृह, बोरद येथील शासकीय आदिवासी आश्रमशाळा आणि शालेय इमारत, दहेल येथील शासकीय आदिवासी आश्रमशाळा, तसेच रोषमाळ येथील एकलव्य मॉडेल निवासी शाळा, शालेय इमारत आणि मुलांचे वसतिगृह बांधकाम इमारतींचा समावेश आहे. प्रकल्प अधिकारी चंद्रकांत पवार यांनी आभार मानले.
Leave a Reply