गेल्या काही दिवसांपासून दोन्ही राष्ट्रवादीच्या विलिनीकरणाची चर्चा सुरू आहे. या विषयावर वेगवेगळे दावे करण्यात येत आहेत. राष्ट्रवादी अजित पवार गटाचे प्रदेशाध्यक्ष सुनील तटकरे यांनी १२ फेब्रुवारी रोजीच दोन्ही राष्ट्रवादीचे विलिनीकरण झाले असते, असा दावा केला होता. त्यानंतर राजकीय वर्तुळातून या विषयावर वेगवेगळ्या प्रतिक्रिया समोर येत आहेत. या पार्श्वभूमीवर खासदार सुप्रिया सुळे यांनी मोठे विधान केले आहे.
सुळे म्हणाल्या की, तुम्हाला या विलिनीकरणाच्या गोष्टींचा कंटाळा आला नसेल, पण मला कंटाळा आलेला आहे. या विषयावर मी यापुढे बोलणार नाही. दादा आणि आमच्या नेत्यांची तसेच राष्ट्रवादीच्या नेत्यांची विलिनीकरणावर चर्चा झाली होती. तारीख ठरली होती, हे सत्य आहे.
दादा गेल्यानंतर चर्चांना पूर्णविराम
माझा भाऊ दादा गेल्यानंतर या चर्चांना आमच्याकडून पूर्णविराम दिला आहे, असे सुळे यांनी सांगितले. अजित पवार गटाकडून काय चर्चा होतात, त्यांच्याशी आमचे देणे-घेणे नाही. आम्ही त्यांच्या प्रतिक्रियांवर काहीही बोलत नाही. माझे आणि माझ्या भावाचे नाते जवळचे होते, तो ओलावा कायम राहील, असेही त्या म्हणाल्या. दादा गेल्यानंतर विलिनीकरणाचा विषय आमच्या मनातही राहिला नाही. तो विषय आमच्यासाठी तिथेच संपला आहे.
सत्तेत सहभागी होणार नाही
महागाई, दुष्काळ आणि धोरणनिर्मिती अशा अनेक गोष्टी चर्चेसाठी आहेत, असे सुळे म्हणाल्या. विलिनीकरणावरच बोलेन, जे विचारायचे ते विचारा, मात्र यापुढे मी शांत बसेन, असे त्यांनी स्पष्ट केले. सत्तेत सहभागी होणार नसल्याचे सांगतानाच लोकशाहीवर आमचा विश्वास असल्याचे मोठे विधानही त्यांनी केले.
स्रोत: मूळ बातमी
Leave a Reply