अभिव्यक्ती स्वातंत्र्याच्या नावाखाली सुरू असलेल्या कारवाईवर आणि सत्ताधाऱ्यांच्या भूमिकेवर मनसे प्रमुख राज ठाकरे यांनी परखड भाष्य केले. पुण्यातील एका साहित्य महोत्सवातील मुलाखतीत त्यांनी विरोधी पक्षाच्या विरोधात सत्ताधाऱ्यांनी काढलेल्या मोर्च्यांवर आणि कोल्हापूरच्या गोकुळ दूध संघ निवडणुकीवरून लोकशाहीच्या सध्याच्या स्थितीवर ताशेरे ओढले.
सरकारच विरोधी पक्षावर मोर्चा काढते
भारतीय जनता पक्षाने लोकशाही वाचवा म्हणून मोर्चा काढल्याचे सांगत राज ठाकरे यांनी आश्चर्य व्यक्त केले. जगात हे एकमेव सरकार असेल, जे विरोधी पक्षावर मोर्चा काढते, असे ते म्हणाले. सामान्यपणे जगात विरोधी पक्ष सरकारच्या विरोधात मोर्चा काढतो, पण इथे उलटीच गंगा वाहताना दिसते, अशी टीका त्यांनी केली.
गोकुळ निवडणुकीचा दाखला
कोल्हापूरच्या गोकुळ दूध संघाच्या निवडणुकीत दुसरे पॅनल जिंकून आल्याचे त्यांनी सांगितले. निवडणूक हरल्यानंतर पराभव मान्य करायला हवा, असे त्यांचे म्हणणे होते. मात्र त्याऐवजी सरकारी सदस्य नेमून ती संस्था पुन्हा आपल्या ताब्यात कशी येईल, याचे प्रयत्न झाल्याचा आरोप त्यांनी केला. अशा वेळी लोकशाही वाचवा हा नारा कुठून आला, असा सवाल त्यांनी उपस्थित केला.
जनतेने मतदान करून कौल दिला, पण तो मान्य नसेल, तर कसली लोकशाही वाचवताय, असा सवालही त्यांनी केला.
व्यंगचित्रकार आणि पत्रकारांवरील भूमिकेवर मत
जनतेने मतदान करूनही निकाल मान्य नसतील आणि अशा कारभारावर एखादा व्यंगचित्रकार, पत्रकार किंवा संपादक बोट ठेवून भाष्य करतो, तेव्हा त्याला स्वैराचार म्हटले जाते, यावर राज ठाकरे यांनी संताप व्यक्त केला. राजकारणात कोणी कोणाचा शत्रू नसतो, पण घडलेल्या घटनेवर भाष्य करणे म्हणजे समोरच्याला आरसा दाखवणे असते, असे ते म्हणाले. ती गोष्ट समजून घेण्याची क्षमता नेत्यांमध्ये नसेल, तर मग विषयच संपतो, असेही त्यांनी नमूद केले.
स्रोत: मूळ बातमी
Leave a Reply