करुणा मुंडे काँग्रेसमध्ये प्रवेश करणार असल्याच्या चर्चा सुरू आहेत. या पार्श्वभूमीवर करुणा मुंडे यांनी काँग्रेसचे प्रदेशाध्यक्ष हर्षवर्धन सपकाळ यांची भेट घेतली आहे. काँग्रेसमध्ये प्रवेश करण्यासंदर्भात आपली भेट झाली, असे करुणा मुंडे यांनी म्हटले आहे. त्यापूर्वी काँग्रेसचे नेते विजय वडेट्टीवार यांच्याशीही त्यांची चर्चा झाली आहे. या सर्व भेटीगाठींवर आता करुणा मुंडे यांची पहिली प्रतिक्रिया समोर आली आहे.
नेमके काय म्हणाल्या मुंडे?
काँग्रेस पक्षाकडून मला काही जबाबदाऱ्या आणि पदाचे पर्याय सुचवण्यात आले आहेत. परंतु मी अद्याप कोणताही निर्णय घेतलेला नाही, असे करुणा मुंडे यांनी सांगितले. काँग्रेसचे नेते विजय वडेट्टीवार यांनीही अशी इच्छा व्यक्त केली होती की, भाजपमध्ये मुंडे आहेत, तर काँग्रेसमध्येही मुंडे पाहिजे. माझ्या कार्यकर्त्यांचीही इच्छा आहे की, मी काँग्रेसमध्ये प्रवेश करावा, असे त्यांनी सांगितले. या सर्व पार्श्वभूमीवर मी काँग्रेसचे प्रदेशाध्यक्ष हर्षवर्धन सपकाळ यांची भेट घेतली. माझे वडेट्टीवार यांच्याशीही बोलणे झाले आहे, अशी प्रतिक्रिया यावेळी करुणा मुंडे यांनी दिली आहे.
करुणा मुंडे कोण आहेत?
करुणा मुंडे यांचे पूर्वीचे नाव करुणा शर्मा असे आहे. राष्ट्रवादीचे नेते आणि माजी मंत्री धनंजय मुंडे यांच्या आपण पहिल्या पत्नी असल्याचा दावा करुणा मुंडे यांनी केला आहे. हे प्रकरण सध्या न्यायालयात आहे. करुणा मुंडे यांनी आपल्या या दाव्यासंदर्भातील काही कागदपत्रेही न्यायालयात सादर केली आहेत. करुणा मुंडे यांनी अनेकवेळा विविध प्रकरणांत धनंजय मुंडे यांच्यावर जोरदार हल्लाबोल केल्याचे पाहायला मिळाले आहे. त्यानंतर आता त्या मोठा निर्णय घेण्याच्या तयारीमध्ये आहेत. त्या काँग्रेसमध्ये प्रवेश करण्याची शक्यता आहे. मात्र अजूनही कोणताही निर्णय झाला नसल्याचे त्यांनी म्हटले आहे.
Leave a Reply