वसई-विरार शहरातील वाहतूक कोंडीचा प्रश्न दिवसेंदिवस गंभीर होत चालला आहे. महामार्गापासून ते अंतर्गत रस्त्यांपर्यंत वाहनांच्या लांब रांगा लागणे आता रोजचे झाले आहे. वाढती लोकसंख्या, वाहनांची वाढती संख्या, अनधिकृत पार्किंग आणि रस्त्यांवरील अतिक्रमणांमुळे नागरिकांना दररोज मनस्ताप सहन करावा लागत आहे. विशेषतः कामावर जाणारे चाकरमानी, विद्यार्थी आणि वाहनचालकांचा मौल्यवान वेळ वाहतूक कोंडीत वाया जात आहे.
२५ लाखांहून अधिक लोकसंख्या असलेल्या वसई-विरारमध्ये नागरी आणि औद्योगिक वसाहतींचा झपाट्याने विस्तार झाला आहे. मुंबई आणि ठाणे परिसरात दररोज ये-जा करणाऱ्या हजारो चाकरमान्यांना सकाळी आणि सायंकाळी कोंडीचा सामना करावा लागतो. नालासोपारा येथील तुळींज रोड, आचोळे मार्ग, एव्हरशाईन सिटी, वसंत नगरी तसेच शहरातील उड्डाणपुलांवर वाहनांच्या लांबच लांब रांगा लागतात.
अनधिकृत पार्किंग आणि अतिक्रमणाचा विळखा
विरारमधील मनवेलपाडा रोड, वसईतील माणिकपूर आणि अंबाडी मार्गावर अनधिकृत रिक्षा पार्किंग आणि फेरीवाल्यांच्या अतिक्रमणांमुळे वाहतुकीची अवस्था बिकट झाली आहे. पादचाऱ्यांनाही रस्त्यावरून चालणे कठीण झाले आहे. सातिवली, वालीव आणि पेल्हार या औद्योगिक पट्ट्यांत अवजड वाहनांची सतत वर्दळ असल्याने कोंडीत भर पडते. त्याचा परिणाम वसई फाटा आणि मुंबई-अहमदाबाद राष्ट्रीय महामार्गावरील वाहतुकीवरही होत आहे.
रुग्णवाहिका आणि शालेय बसनाही फटका
कोंडीचा फटका केवळ वाहनचालकांनाच नव्हे, तर रुग्णवाहिका आणि शालेय बसनाही बसत आहे. रुग्णांना वेळेत रुग्णालयात पोहोचवणे आणि विद्यार्थ्यांना शाळेत जाणे कठीण होत आहे. वाहनांच्या रांगा, सतत सुरू असलेली इंजिने आणि इंधनाचा अपव्यय यामुळे प्रदूषणाची समस्याही गंभीर होत आहे.
ही समस्या नित्याची झाली असताना त्यावर कायमस्वरूपी उपाययोजना होत नसल्याची नागरिकांची तक्रार आहे. महापालिका प्रशासन आणि वाहतूक पोलिसांनी समन्वयाने नियोजन करून अनधिकृत पार्किंग व अतिक्रमणे हटवावीत, प्रमुख चौकांमध्ये वाहतूक नियंत्रणाची प्रभावी व्यवस्था करावी आणि अवजड वाहनांच्या वाहतुकीचे नियमन करावे, अशी मागणी होत आहे. महापालिकेचे नगरसेवक पंकज देशमुख यांनीही प्रशासनाची अनास्था दिसून येत असल्याचे म्हणत अतिक्रमणे हटवून वाहतुकीचे योग्य नियोजन करण्याची गरज व्यक्त केली आहे.
स्रोत: मूळ बातमी
Leave a Reply