सातारा जिल्ह्यातील कोरेगाव तालुक्यातील शहापूर गावात ऊसतोड सुरू असताना उसाच्या फडात बिबट्याची दोन बछडी आढळून आली. ही बछडी त्यांच्या आईपासून वेगळी झाली होती. वन विभागाने दोन दिवसांच्या विशेष प्रयत्नांनंतर बिबट्याच्या मादीला पकडले आणि बछड्यांची आईशी भेट घडवून दिली. या मोहिमेमुळे गावात पसरलेली भीतीही कमी झाली आहे.
ऊसतोड सुरू असताना बछडी आढळली
शहापूर आणि परिसरात यापूर्वीही रात्रीच्या वेळी शेतकऱ्यांना आणि ग्रामस्थांना बिबट्या दिसला होता. त्यामुळे या भागात बिबट्याचा वावर असल्याची चर्चा अनेक दिवसांपासून सुरू होती. अशातच यंत्राच्या साहाय्याने ऊसतोड सुरू असताना उसाच्या फडात दोन बछडी दिसल्याने परिसरात खळबळ उडाली. ग्रामस्थांमध्ये भीतीचे वातावरण निर्माण झाले होते. ऊसतोड कामगारांनी बछडी आढळल्याची माहिती तत्काळ स्थानिक नागरिकांना दिली. त्यानंतर ग्रामस्थांनी लगेच वन विभागाशी संपर्क साधला. वन विभागाचे अधिकारी चंद्रहार जगदाळे यांनी घटनास्थळी धाव घेत दोन्ही बछड्यांना सुरक्षितपणे ताब्यात घेतले.
दोन दिवसांची विशेष मोहीम
वन विभागाच्या अधिकाऱ्यांच्या म्हणण्यानुसार, ही बछडी अवघी सात ते आठ दिवसांची आहेत. त्यांना आईपासून कायमचे दूर करणे योग्य नसल्याने वन विभागाने काळजीपूर्वक नियोजन केले. बछड्यांना नैसर्गिकरीत्या मादीच्या स्वाधीन करण्यासाठी विशेष मोहीम हाती घेण्यात आली. बछडी आढळलेल्या परिसरात कॅमेरे लावून बिबट्याच्या मादीच्या हालचालीवर लक्ष ठेवण्यात आले. मादीला सुरक्षितपणे पकडण्यासाठी वन विभागाच्या कर्मचाऱ्यांनी सलग दोन दिवस विशेष प्रयत्न केले. या मोहिमेला अखेर यश आले आणि बिबट्याच्या मादीला पकडण्यात आले. त्यानंतर मादी बिबट्याला नैसर्गिक अधिवासात सोडण्यात आले.
ही कारवाई सातारा वन विभागाचे उपवनसंरक्षक धैर्यशील पाटील आणि सहायक वनसंरक्षक दिगंबर जाधव यांच्या नेतृत्वाखाली करण्यात आली. मोहिमेत कोरेगाव वन परिक्षेत्राचे अधिकारी चंद्रहार जगदाळे यांच्या मार्गदर्शनाखाली वाठार स्थानकाच्या वनपाल सुरेखा जगदाळे, वनरक्षक सुभाष बडदे, अजय कांबळे, सुनील शेलार, सागर बोडरे आणि प्रणव माकर यांनी महत्त्वाची भूमिका बजावली.
स्रोत: मूळ बातमी
Leave a Reply