वाशिम : पेन्शनधारकांसाठी घरबसल्या डिजिटल जीवन प्रमाणपत्र

वाशिम जिल्ह्यातील निवृत्तीवेतनधारक आणि कुटुंब निवृत्तीवेतनधारकांना दरवर्षी सादर करावे लागणारे जीवन प्रमाणपत्र आता अधिक सुलभ आणि सोयीस्कर पद्धतीने सादर करता येणार आहे. केंद्र शासनाच्या डिजीटल जीवन प्रमाणपत्र अभियान ५ अंतर्गत चेहरा प्रमाणीकरणाद्वारे ऑनलाइन जीवन प्रमाणपत्र सादर करण्याची सुविधा उपलब्ध करून देण्यात आली आहे.

या सुविधेमुळे पेन्शनधारकांना बँकेत प्रत्यक्ष जाऊन कागदपत्रे सादर करण्याची गरज राहणार नाही. जिल्ह्यातील सर्व पात्र निवृत्तीवेतनधारकांनी या सुविधेचा लाभ घेऊन ३० नोव्हेंबरपर्यंत डिजीटल जीवन प्रमाणपत्र सादर करावे, असे आवाहन जिल्हाधिकारी योगेश कुंभेजकर यांनी केले आहे.

चेहरा स्कॅन करून प्रमाणपत्र

जिल्हाधिकारी कार्यालयातील काटेपूर्णा सभागृहात देशव्यापी डिजीटल जीवन प्रमाणपत्र अभियानाच्या अनुषंगाने जिल्हास्तरीय बैठक आयोजित करण्यात आली होती. या बैठकीत जिल्हाधिकारी बोलत होते. यावेळी निवासी उपजिल्हाधिकारी विश्वनाथ घुगे, जिल्हा कोषागार अधिकारी, सर्व उपकोषागार अधिकारी तसेच भारतीय स्टेट बँक आणि बँक ऑफ महाराष्ट्रच्या शाखा व्यवस्थापकांची उपस्थिती होती.

वाशिम जिल्ह्यात एकूण ७ हजार १३५ राज्य शासकीय निवृत्तीवेतनधारक, तर १ हजार २३४ कुटुंब निवृत्तीवेतनधारक आहेत. यामध्ये ८० वर्षांवरील ९७ निवृत्तीवेतनधारकांचा समावेश आहे. मात्र, आतापर्यंत केवळ ५१५ निवृत्तीवेतनधारकांनी डिजिटल जीवन प्रमाणपत्र सादर केले आहे.

वयोवृद्ध आणि आजारी पेन्शनधारकांना दिलासा

डिजीटल जीवन प्रमाणपत्राच्या सुविधेमुळे विशेषतः वयोवृद्ध, आजारी आणि शारीरिक अडचणी असलेल्या निवृत्तीवेतनधारकांना मोठा दिलासा मिळणार आहे. स्मार्टफोनच्या माध्यमातून चेहरा प्रमाणीकरण करून जीवन प्रमाणपत्र सादर करता येत असल्याने बँक किंवा कोषागार कार्यालयात जाण्याची धावपळ कमी होणार आहे. वेळेची बचत होण्यासोबतच प्रमाणपत्र सादर करण्याची प्रक्रियाही अधिक सुलभ होणार आहे.

वाशिम कोषागार कार्यालयातून निवृत्तीवेतन किंवा कुटुंब निवृत्तीवेतन घेणाऱ्या राज्य शासकीय कर्मचाऱ्यांसाठी ३० नोव्हेंबरपर्यंत हे अभियान राबविण्यात येत आहे. यासाठी जीवन प्रमाण आणि फेस आरडी अॅपच्या माध्यमातून चेहरा प्रमाणीकरण करून डिजीटल जीवन प्रमाणपत्र तयार करण्याची सुविधा उपलब्ध आहे. जिल्ह्यातील सर्व निवृत्तीवेतनधारक आणि कुटुंब निवृत्तीवेतनधारकांनी ३० नोव्हेंबर ही अंतिम मुदत लक्षात घेऊन डिजीटल जीवन प्रमाणपत्र सादर करावे, असे आवाहन करण्यात आले आहे.

स्रोत: मूळ बातमी