सातारा जिल्हा बँकेच्या अध्यक्षपदाची निवड सहा दिवसांवर आली असताना उपमुख्यमंत्री एकनाथ शिंदे आणि सार्वजनिक बांधकाम मंत्री शिवेंद्रराजे भोसले यांची भेट झाली आहे. सातारा दौऱ्यावर आलेल्या शिंदे यांची भोसले यांनी महाबळेश्वर तालुक्यातील दरे येथे भेट घेतली. दोघांमध्ये जिल्ह्यातील विकासकामांवर चर्चा झाली. या भेटीनंतर दोघांमधील हस्तांदोलनामुळे अध्यक्ष निवडीबाबतची उत्सुकता आणखी वाढली आहे.
सातारा जिल्हा मध्यवर्ती सहकारी बँकेच्या अध्यक्षपदावरून महायुतीत सध्या रस्सीखेच सुरू आहे. अध्यक्ष भाजपचाच होईल आणि निर्णय मुख्यमंत्री घेतील, असे भाजपचे मंत्री जयकुमार गोरे यांनी म्हटले आहे. दुसरीकडे अध्यक्षपदाचा तिढा स्थानिक पातळीवर चर्चेतून सोडवण्याचा प्रयत्न करू, असे पालकमंत्री शंभूराज देसाई यांनी म्हटले आहे. भाजप आणि शिवसेनेच्या परस्परविरोधी दाव्यांमुळे महायुतीत सर्व काही आलबेल नसल्याचे चित्र दिसत आहे.
संचालक मंडळातील बलाबल
जिल्हा मध्यवर्ती बँकेत भाजपचे नऊ, राष्ट्रवादी काँग्रेसचे आठ आणि शिवसेनेचे चार संचालक आहेत. शिंदे यांची शिवसेना आणि राष्ट्रवादी काँग्रेस एकत्र आल्यास त्यांची बेरीज बारा होते. नऊ जागा असलेल्या भाजपला बहुमतासाठी आणखी दोन ते तीन संचालकांची गरज आहे. त्यामुळे भाजप आणि राष्ट्रवादीसाठी शिवसेनेचे चार संचालक निर्णायक ठरणार आहेत. ही आकडेवारी पाहता शिवसेना आणि राष्ट्रवादीला जिल्हा परिषदेतील सत्तासंघर्षाचा बदला घेण्याची संधी चालून आली आहे.
जिल्हा परिषदेतील वादाची पार्श्वभूमी
जिल्हा परिषदेच्या निवडणुकीत भाजप स्वबळावर लढला होता, तर शिवसेना आणि राष्ट्रवादीची युती होती. एकट्या भाजपच्या जागा जास्त होत्या, पण राष्ट्रवादी आणि शिवसेना युतीची बेरीज भाजपपेक्षा जास्त होती. तरीही भाजपने अध्यक्ष आणि उपाध्यक्ष या दोन्ही पदांवर कब्जा केला होता. अध्यक्ष आणि उपाध्यक्ष निवडीच्या दिवशी पालकमंत्री शंभूराज देसाई, मदत व पुनर्वसन मंत्री मकरंद पाटील आणि राज्यसभा खासदार नितीन पाटील यांना पोलिसांकडून धक्काबुक्की झाली होती.
त्या घटनेनंतर भाजप आणि शिवसेना-राष्ट्रवादीमधील संबंध ताणले गेले होते. नंतर तणाव निवळला, तरी जखम भळभळत राहिली. आता जिल्हा बँकेच्या निवडणुकीतही शिवसेना आणि राष्ट्रवादीला सत्ता स्थापन करण्याची संधी आली आहे. महायुतीत तणाव नको म्हणून भाजप नेत्यांनी संयमाची भूमिका घेतली आहे. त्याचबरोबर भाजपमध्ये अध्यक्षपदावरून अंतर्गत रस्सीखेच सुरू असल्याचेही कळते.
ग्रामविकास मंत्री जयकुमार गोरे यांना बँकेचा अध्यक्ष भाजपचा हवा आहे. गोरे यांना स्वतः किंवा रणजितसिंह नाईक-निंबाळकर यांना अध्यक्ष व्हायचे किंवा करायचे आहे, अशीही राजकीय चर्चा आहे. गोरे यांचे मनसुबे काहीही असले, तरी साताऱ्याचे दोन्ही राजे आणि पालकमंत्री शंभूराज देसाई, मदत व पुनर्वसन मंत्री मकरंद पाटील, तसेच ज्येष्ठ नेते रामराजे नाईक-निंबाळकर यांच्या भूमिका महत्त्वाच्या ठरणार आहेत. या सर्व पार्श्वभूमीवर शिंदे सातारा दौऱ्यावर असताना शिवेंद्रराजे भोसले यांनी त्यांची भेट घेतल्याने अध्यक्ष निवडीत मोठा ट्विस्ट येऊ शकतो.
स्रोत: मूळ बातमी
Leave a Reply