नाशिक महापालिकेतील नामनिर्देशित नगरसेवकांच्या नियुक्तीचा मार्ग मोकळा झाला आहे. महापालिका प्रशासनाकडून दहा नामनिर्देशित सदस्यांच्या नावांचा प्रस्ताव महासभेच्या मान्यतेसाठी सादर करण्यात आला आहे. या प्रस्तावानुसार भाजपच्या वाट्याला सहा, शिवसेना-मनसे आघाडीला दोन, तर शिवसेना (उबाठा)-काँग्रेस आघाडीला दोन जागा मिळणार आहेत. अधिकृत घोषणेनंतर नगरसेवक पदावर शिक्कामोर्तब होणार आहे.
जानेवारीतील निवडणूक आणि कायदेशीर तरतूद
जानेवारीत महापालिकेची सार्वत्रिक निवडणूक पार पडली. त्यात ३१ प्रभागांतून एकूण १२२ नगरसेवक निवडून आले आहेत. महापालिका अधिनियमानुसार नामनिर्देशित सदस्यांची संख्या एकूण निवडून आलेल्या सदस्यांच्या दहा टक्क्यांपेक्षा अधिक नसावी किंवा दहा सदस्यांपेक्षा अधिक नसावी, अशी तरतूद आहे. त्यानुसार दहा नामनिर्देशित सदस्यांची नियुक्ती करण्यात येणार आहे. नियुक्ती संदर्भात उच्च न्यायालयात याचिका दाखल होती. न्यायालयाने २९ सप्टेंबर २०२६ रोजी दिलेल्या आदेशानुसार सहा आठवड्यांच्या आत नामनिर्देशित सदस्यांची नियुक्ती प्रक्रिया पूर्ण करण्याचे निर्देश दिले होते.
नावे कशी निश्चित झाली?
महापालिका आयुक्त मनीषा खत्री यांच्या अध्यक्षतेखाली झालेल्या बैठकीत पक्षांच्या संख्याबळानुसार नामनिर्देशित सदस्यांच्या नावांवर चर्चा करण्यात आली. त्यानंतर संबंधित पक्ष व आघाड्यांकडून प्राप्त झालेल्या नावांची छाननी करून दहा उमेदवारांची नावे निश्चित करण्यात आली आहेत. छाननीनंतर दहा अर्ज वैध ठरविण्यात आले. काँग्रेसकडून भाजपच्या उमेदवाराच्या नावाचा प्रस्ताव सादर करण्यात आला होता, परंतु छाननी समितीने गटनेत्यांचा प्रस्ताव ग्राह्य धरत काँग्रेसचे पत्र फेटाळले. आता येत्या २० नोव्हेंबरला होणाऱ्या महासभेत अधिकृत घोषणा झाल्यानंतर नगरसेवक पदावर शिक्कामोर्तब होणार आहे.
प्रस्तावित नावांमध्ये शिवसेना (उबाठा) कडून हेमंतकुमार गायकवाड आणि बाबासाहेब गायकवाड, शिवसेनेकडून चंद्रकांत लवटे आणि विनायक आढाव, तर भाजपकडून रोहिणी नायडू, रामहरी संभेराव, अजित चव्हाण, हेमंत धात्रक, संदीप लेनकर आणि चंद्रशेखर पंचाक्षरी यांचा समावेश आहे.
स्रोत: मूळ बातमी
Leave a Reply