जळगाव : जिल्हा परिवीक्षा आणि अनुरक्षण संघटना संचालित मुला-मुलींच्या बालगृहात दाखल असलेल्या अनाथ, निराधार, आश्रित आणि वाट चुकलेल्या बालकांच्या चेहऱ्यावर हास्य फुलवण्यासाठी तसेच त्यांच्या आयुष्यात आशेचा दीप प्रज्वलित करण्यासाठी दिवाळी कार्यक्रम घेण्यात आला. बालगृहातील बालकांची दिवाळी आनंदात पार पडावी, यासाठी बालगृह अधीक्षक रविकिरण अहिरराव यांच्या प्रयत्नांनी वसुबारसपासून भाऊबीजपर्यंतचे सर्व सांस्कृतिक उपक्रम पार पडले.
कपडे, मिठाई आणि फटाक्यांचे वाटप
दिवाळीचे औचित्य साधून मुला-मुलींना कपडे, बूट, मिठाई, फराळ, भेटवस्तू आणि विविध आवश्यक साहित्य तसेच आकर्षक फटाके वाटप करण्यात आले. यावेळी मुला-मुलींनी फटाके फोडण्याचा मनसोक्त आनंद घेतला. बालगृहाच्या परिसरात आकर्षक रोषणाई करण्यात आली होती. आकाश कंदील, फुलमाळा आणि रंगीबेरंगी रांगोळ्यांनी संस्थेचा परिसर सुशोभित करण्यात आला होता.
मान्यवरांची उपस्थिती
कार्यक्रमाला न्यायाधीश (वर्ग १) एस. व्ही. खोंगल, विधी सेवा प्राधिकरणाचे सचिव एस. एन. बुद्रुक, दिवाणी न्यायाधीश श्री. वाळके, दाते सुनंदा पटेल, बालगृह अधीक्षक अहिरराव, संस्थेचे मानद सचिव सुनील पाटील आणि बालगृहातील कर्मचारी उपस्थित होते.
स्रोत: मूळ बातमी
Leave a Reply