चहा प्यायल्यानंतर लगेच जेवण करता? थांबा!

अनेक भारतीयांची सकाळची सुरुवात चहाच्या कपाने होते. सकाळचा नाश्ता असो किंवा दुपारच्या जेवणानंतरचा ब्रेक, चहा पिण्याची सवय अनेकांच्या दररोजच्या रुटीनचा भाग बनली आहे. काही जणांना जेवणाआधी चहा प्यायला आवडतो, तर काही जण जेवण झाल्यानंतर लगेच चहाचा आस्वाद घेतात. मात्र चहा प्यायल्यानंतर लगेच जेवण करणे किंवा जेवणानंतर त्वरित चहा प्यायल्याने पचनक्रियेवर परिणाम होऊ शकतो. चहामधील काही घटक शरीरातील आयरनच्या शोषणावर परिणाम करू शकतात. त्यामुळे चहा आणि जेवण यामध्ये योग्य अंतर ठेवणे महत्त्वाचे ठरते.

आयर्न आणि पचनावर परिणाम

चहामध्ये टॅनिन आणि पॉलीफेनॉल नावाची संयुगे असतात, जी नॉन-हीम आयरनचे शोषण कमी करू शकतात. चहा प्यायल्यानंतर लगेच आयरनयुक्त पदार्थ खाल्ल्याने शरीराच्या आयरन शोषणात अडथळा येऊ शकतो. त्यामुळे अॅनिमिया किंवा लोहाच्या कमतरतेने ग्रस्त असलेल्या लोकांनी विशेष खबरदारी घ्यावी. पालक, मसूर, चणे, राजमा आणि हिरव्या भाज्या खात असाल, तर त्यानंतर लगेच चहा प्यायल्याने आयरनचे शोषण कमी होऊ शकते. म्हणून संपूर्ण पौष्टिक लाभ मिळवण्यासाठी चहा आणि आयरनयुक्त पदार्थांमध्ये अंतर ठेवणे उत्तम आहे. चहामधील कॅफीनमुळे काही लोकांना अॅसिडिटी, छातीत जळजळ किंवा अस्वस्थता जाणवू शकते. आधीपासूनच अॅसिड रिफ्लक्स किंवा गॅसचा त्रास असेल, तर चहा आणि जेवणाच्या वेळेकडे लक्ष देणे जास्त महत्त्वाचे आहे. जास्त चहा प्यायल्याने झोप न येण्याचा त्रास होऊ शकतो आणि हृदयाचे ठोके वाढू शकतात. त्यामुळे दिवसभरात जास्त चहा पिणे टाळावे.

चहा आणि जेवणात किती अंतर ठेवावे?

जेवणापूर्वी सुमारे एक तास आधी चहा पिणे हा एक चांगला पर्याय असू शकतो. जेवणानंतर किमान एक तासाने चहा पिऊ शकता. आयरनयुक्त पदार्थ आणि चहा यांच्यामध्ये सुमारे एक ते दोन तासांचे अंतर ठेवा. आयरनच्या गोळ्या घेत असाल तर चहाबरोबर गोळ्या घेऊ नका. डॉक्टरांच्या सल्ल्यानुसार योग्य अंतर ठेवा. त्यामुळे चहा पिण्याची वेळ आणि जेवणाची वेळ यामध्ये योग्य अंतर ठेवणे हाच आरोग्य जपण्याचा सोपा मार्ग आहे. हा लेख केवळ सामान्य माहितीसाठी असून कोणताही उपाय करण्यापूर्वी डॉक्टरांचा सल्ला घ्यावा.

स्रोत: मूळ बातमी