पुणे शहराचे नाव ‘फुले नगर’ करावे, अशी मागणी राष्ट्रीय ओबीसी मुक्ती मोर्चाने मुख्यमंत्री देवेंद्र फडणवीस यांच्याकडे केली आहे. महात्मा जोतिबा फुले यांच्या द्विशताब्दीच्या निमित्ताने मोर्चाच्या पदाधिकाऱ्यांनी नागपुरात मुख्यमंत्र्यांची भेट घेऊन यासंदर्भात निवेदन दिले. महात्मा फुले यांनी शैक्षणिक आणि सामाजिक सुधारणेच्या क्षेत्रात केलेले काम बहुमूल्य असून त्यांचे कर्मक्षेत्र राहिलेल्या पुण्याचे नाव ‘फुलेनगर’ करण्यासाठी राज्य सरकारने आवश्यक ठराव लवकरात लवकर करावा, अशी मागणी निवेदनात करण्यात आली आहे.
भारतरत्न आणि विशेष अधिवेशनाची मागणी
महात्मा जोतिबा फुले यांना भारतरत्न देण्याची मागणीही निवेदनात करण्यात आली आहे. भारतरत्न किताब देण्याच्या प्रस्तावाचा राज्य सरकारने पाठपुरावा करावा, असे मोर्चाने म्हटले आहे. तसेच महात्मा फुले यांच्या कार्यावर चर्चा करण्यासाठी विधीमंडळाचे एक दिवसीय विशेष अधिवेशन आयोजित करण्यात यावे, अशी मागणीही करण्यात आली आहे.
शिक्षण आणि स्मृती जपण्याच्या मागण्या
सर्व विद्यापीठांत महात्मा फुले अध्यासन वर्ग सुरू करावेत, अशी मागणीही निवेदनात आहे. प्रागतिक कृती व प्रबोधन करणाऱ्या संस्था आणि व्यक्तींना ‘सत्यशोधक भूषण पुरस्कार’ देण्याचे उपक्रम सुरू करावेत, असेही मोर्चाने म्हटले आहे. महात्मा ज्योतिबा फुले यांचे समग्र वाङ्मय राज्यातील सर्व ग्रामपंचायत आणि नगरपरिषदांमधील वाचनालयांत उपलब्ध करून देण्यात यावे, अशी मागणी करण्यात आली आहे. ज्या शाळांमध्ये विद्यार्थ्यांची उपस्थिती शंभर टक्के आहे, अशा शाळांना महात्मा फुले गुरुवर्य पुरस्कार देण्यात यावा आणि सरकारच्या बहुजन कल्याण विभागातर्फे ‘सत्यशोधक विवाह उपक्रम’ आयोजनासाठी विविध संस्थांना सहयोग करावा, अशा मागण्याही निवेदनात करण्यात आल्या आहेत.
स्रोत: मूळ बातमी
Leave a Reply