पाकिस्तानचे माजी परराष्ट्र मंत्री आणि पाकिस्तान तहरीक-ए-इंसाफ पक्षाचे उपाध्यक्ष शाह महमूद कुरेशी यांची तुरुंगात अचानक प्रकृती बिघडली आहे. लाहोरच्या कोट लखपत तुरुंगात चालत असताना त्यांना अचानक तीव्र चक्कर आली. त्यामुळे त्यांचा तोल गेला आणि ते जमिनीवर जोरात कोसळले. या घटनेत त्यांच्या हाताला आणि गुडघ्याला गंभीर दुखापत झाली आहे. त्यांना तातडीने उपचारासाठी रुग्णालयात दाखल करण्यात आले आहे. या घटनेमुळे पाकिस्तानच्या राजकीय वर्तुळात खळबळ उडाली आहे.
नेमकी घटना कशी घडली?
मिळालेल्या माहितीनुसार, ही घटना सोमवारी लाहोरमधील कोट लखपत तुरुंगात घडली. ७० वर्षीय कुरेशी आपल्या बॅरेकमध्ये नेहमीप्रमाणे फिरत असताना त्यांना अचानक अस्वस्थ वाटू लागले. डोळ्यांसमोर अंधारी आल्याने त्यांना चक्कर आली आणि ते थेट जमिनीवर आदळले. या पडझडीत त्यांच्या हाताला आणि पायाच्या गुडघ्याला मार लागून गंभीर जखमा झाल्या.
प्रकृती खालावल्याचे लक्षात येताच तुरुंग प्रशासनाने तातडीच्या हालचाली केल्या. त्यांना लाहोरमधील पंजाब इन्स्टिट्यूट ऑफ कार्डिओलॉजी रुग्णालयात हलवण्यात आले. पक्षाचे कायदेशीर सल्लागार आणि वकील राणा मुदस्सिर उमर यांनी सांगितले की, प्रकृती अत्यंत खालावल्यामुळे त्यांना तातडीने वैद्यकीय सहाय्याची गरज होती. सध्या डॉक्टरांचे एक विशेष पथक त्यांच्या प्रकृतीवर २४ तास कडक नजर ठेवून आहे. २४ तासांच्या निरीक्षणानंतरच ते रुग्णालयातच राहणार की त्यांना पुन्हा तुरुंगात पाठवले जाणार, याचा अंतिम निर्णय घेतला जाईल.
ऑगस्ट २०२३ पासून तुरुंगात
कुरेशी गेल्या काही काळापासून अत्यंत कठीण परिस्थितीतून जात आहेत. ९ मे २०२३ रोजी पाकिस्तानात झालेल्या हिंसक निदर्शने आणि दंग्याशी संबंधित विविध प्रकरणांमध्ये त्यांना ऑगस्ट २०२३ मध्ये अटक करण्यात आली होती. तेव्हापासून ते वेगवेगळ्या कारागृहात बंदी आहेत. याआधीही प्रकृतीच्या अस्वास्थ्यामुळे त्यांना विविध वैद्यकीय तपासण्यांसाठी आणि उपचारांसाठी रुग्णालयात न्यावे लागले होते.
दरम्यान, वडिलांच्या प्रकृती बिघडल्याची आणि ते तुरुंगात पडल्याची बातमी पसरल्यानंतर त्यांची मुलगी मेहेर बानो यांनी तीव्र संताप व्यक्त केला आहे. त्यांनी पाकिस्तान सरकारवर निशाणा साधत वडिलांच्या सुरक्षिततेबद्दल आणि सुटकेबद्दल गंभीर प्रश्न उपस्थित केले आहेत. मेहेर बानो यांनी सांगितले की, साडेतीन वर्षांपूर्वी त्यांचे वडील पूर्णपणे निरोगी आणि कणखर होते. राजकीय द्वेषापोटी त्यांना खोट्या आरोपांखाली तुरुंगात ठेवण्यात आल्याचा आरोप त्यांनी केला. त्यांनी सांगितले की, त्यांच्या वडिलांनी सिफर प्रकरण धैर्याने लढले आणि आपल्या तत्त्वांशी कधीही तडजोड केली नाही. जामीन अर्जांवर ९० पेक्षा जास्त वेळा सुनावणी पार पडली असली, तरी आवश्यक कागदपत्रे न्यायालयात सादर केली जात नसल्याचेही त्यांनी म्हटले. कुरेशी यांनी चार दशकांहून अधिक वर्षे पाकिस्तानच्या राजकारणात दिली असून दोनदा देशाचे परराष्ट्र मंत्री म्हणून जबाबदारी सांभाळली आहे. त्यांनी तात्काळ न्याय आणि वृद्ध वडिलांच्या सुटकेची मागणी केली आहे.
स्रोत: मूळ बातमी
Leave a Reply