सोन्यावर दबाव कायम; २०२७ पर्यंत व्याजदर वाढीचा इशारा

सोने खरेदीचा किंवा सोन्यात गुंतवणूक करण्याचा विचार करत असाल, तर सावध व्हा. सोने आणि चांदीच्या किमतींतील अलीकडच्या तीव्र चढ-उतारानंतर गुंतवणूकदारांची चिंता वाढली आहे. या दरम्यान गोल्डमन सॅक्सने अमेरिकेतील व्याजदरांबाबत इशारा दिला आहे. महागाई नियंत्रणात राहिली नाही, तर २०२७ पर्यंत आणखी व्याजदर वाढू शकतात, असे ब्रोकरेजने म्हटले आहे.

सोन्याच्या किमतीवर दबाव कायम

गेल्या काही दिवसांपासून सोन्याच्या किमतींवरील दबाव वाढला आहे. स्पॉट गोल्डची किंमत ४,०४६ वर कमी झाली, तर भारतीय बाजारात सोन्याची झळाळी १.३६ लाखांपर्यंत उतरली होती. त्याचवेळी अलीकडेच सोन्याच्या किंमतीत वाढीचा कल पाहायला मिळत आहे. त्यामुळे खरेदीदारांसोबतच गुंतवणूक करणाऱ्यांमध्येही संभ्रम दिसत आहे.

पुढील वर्षभर अमेरिकेतील व्याजदरांवर सोन्याची मदार राहणार असल्याचे जाणकारांचे म्हणणे आहे. जागतिक गुंतवणूक कंपनी गोल्डमन सॅक्स ॲसेट मॅनेजमेंटने म्हटले की, अमेरिकेतील महागाई अपेक्षेपेक्षा जास्त राहिली, तर फेड रिझर्व्ह व्याजदरांबाबत आणखी कठोर भूमिका घेण्याची शक्यता आहे. म्हणजे भविष्यात व्याजदरात आणखी वाढ होऊ शकते.

व्याजदर वाढल्यास सोन्यावर परिणाम

गोल्डमन सॅक्स ॲसेट मॅनेजमेंटच्या मल्टी-सेक्टर फिक्स्ड इन्कम इन्व्हेस्टिंगच्या प्रमुख लिंडसे रोझेन म्हणतात की, कंपनीच्या मूळ अंदाजानुसार डिसेंबरमध्ये अमेरिकेत व्याजदर वाढण्याची शक्यता आहे. पण चिंता केवळ डिसेंबरपुरती मर्यादित नाही. अमेरिकेतील महागाई सातत्याने उच्च राहिली, तर २०२७ पर्यंत व्याजदरात आणखी वाढ सुरू राहू शकते. यामुळे दीर्घकाळासाठी कर्ज घेणे महागच राहील.

मध्यवर्ती बँकांनी व्याजदर वाढवल्यास गुंतवणुकीवर व्याज देणाऱ्या पर्यायांचे गुंतवणूकदारांमध्ये आकर्षण वाढते. सोन्यावर कोणतेही व्याज मिळत नाही, त्यामुळे अशा स्थितीत सोन्याच्या मागणीवर परिणाम होतो. परिणामी व्याजदर वाढ सोन्यातील गुंतवणुकीस आव्हानात्मक ठरू शकते. अमेरिकन शेअर बाजारातील घसरण आणि सोन्यामधील कमजोरीच्या पार्श्वभूमीवर गुंतवणूकदार आता महागाईची आकडेवारी आणि फेड रिझर्व्हच्या पुढील निर्णयांवर लक्ष ठेवून असतील.

दिवाळीनंतर देशांतर्गत बाजारात सोने आणि चांदीच्या दरात तेजीचा कल परतला आहे. बुधवारी सोने १,४०० रुपये, तर चांदीची किंमत ५,००० रुपयांनी वाढली. एमसीएक्सवर सोने १,४१,७९३ रुपये प्रति १० ग्रॅम, तर चांदीच्या फ्युचर्स किंमती १,८७,४७४ रुपयांच्या आसपास व्यवहार करत आहेत. भारतात दिवाळीच्या उत्साहात अमेरिकेत चलनवाढीचे आकडे जाहीर झाले. त्यानुसार अमेरिकेत ऑक्टोबरमधील मुख्य चलनवाढ ०.४ टक्के आणि मूळ चलनवाढ ०.३ टक्के होती, जी अपेक्षेपेक्षा जास्त आहे. यामुळे अमेरिकी डॉलर आणि बॉण्डवरील परतावा मजबूत झाला, परिणामी मौल्यवान धातूंवर दबाव आला. त्याचवेळी कच्च्या तेलाचा दर कमी झाल्यामुळे भारतीय बाजाराला काहीसा दिलासा मिळाला असला तरी, अमेरिकेच्या व्याजदरांबाबत वाढत्या अपेक्षा पूर्णपणे शमलेल्या नाहीत.

स्रोत: मूळ बातमी