एसटी महामंडळाच्या बसमधून प्रवास करणाऱ्या महिला प्रवाशांना तिकिटात ५० टक्के सवलत दिली जाते. मात्र, या सवलतीसाठी राष्ट्रीय सामान्य गतिशीलता कार्ड (एनसीएमसी) नोंदणी अनिवार्य करण्याच्या निर्णयाला शासनाने ३१ डिसेंबर २०२६ पर्यंत मुदतवाढ दिली असतानाही एसटीच्या वाहकांनाच या निर्णयाची माहिती नसल्याचा प्रकार समोर आला आहे. परिणामी महिला प्रवाशांकडून सवलतीऐवजी पूर्ण तिकीट दर आकारला जात असल्याने प्रवाशांना आर्थिक भुर्दंड सहन करावा लागत आहे. नागपूर ते माहूर जाणाऱ्या एसटी बसमध्ये हा प्रकार उघडकीस आला.
मिळालेल्या माहितीनुसार, एमएच १४ एमएच ९३२७ क्रमांकाच्या नागपूर ते माहूर बसमधून मोनाली आशिष पाठराबे या महिला प्रवासी प्रवास करीत होत्या. त्यांना नागपूर ते वर्धा या प्रवासासाठी वाहकाने सुरुवातीला १५० रुपयांचे पूर्ण तिकीट दिले. महिला प्रवाशांना एसटी प्रवासात ५० टक्के सवलत असताना पूर्ण तिकीट का आकारले जात आहे, अशी विचारणा त्यांनी वाहकाकडे केली. यावर वाहकाने एनसीएमसी कार्डच्या नोंदणीबाबतच्या निर्णयाचा हवाला देत मुदतवाढीबाबत आपल्याला कोणत्याही सूचना मिळाल्या नसल्याचे सांगितले. तसेच मुदतवाढ देण्यात आल्याची माहिती खोटी असावी, अशी शंकाही त्याने व्यक्त केली. त्यामुळे महिला प्रवाशाला काही काळ पूर्ण तिकीट दरानेच प्रवास करावा लागणार असल्याचे चित्र निर्माण झाले.
वरिष्ठांशी बोलल्यानंतर वाहकाने अर्धे पैसे केले परत
मात्र, महिला प्रवाशांनी याबाबत ठामपणे विचारणा केल्यानंतर वाहकाने वरिष्ठ अधिकाऱ्यांशी फोनवरून संपर्क साधला. त्यावेळी एनसीएमसी नोंदणी अनिवार्य करण्याच्या निर्णयाला ३१ डिसेंबर २०२६ पर्यंत मुदतवाढ देण्यात आल्याची माहिती त्याला मिळाली. त्यानंतर वाहकाने आपली चूक दुरुस्त करीत संबंधित महिला प्रवाशाला सवलतीनुसार ७५ रुपयांचे तिकीट दिले. तसेच सुरुवातीला आकारण्यात आलेल्या १५० रुपयांमधील अतिरिक्त ७५ रुपये परत करण्यात आले.
दिवाळीच्या गर्दीत महिलांना मनस्ताप
सध्या दिवाळीच्या सुट्ट्यांमुळे एसटी बसमधून प्रवास करणाऱ्या प्रवाशांची संख्या मोठ्या प्रमाणात वाढली आहे. विशेषतः महिला प्रवाशांची गर्दी पाहायला मिळत आहे. अशा परिस्थितीत शासनाने दिलेल्या मुदतवाढीच्या निर्णयाची माहितीच वाहक आणि कर्मचाऱ्यांपर्यंत पोहोचली नसल्याचे यातून स्पष्ट झाले आहे. महिला प्रवाशांना सवलतीचा लाभ मिळण्यासाठी प्रत्येक वेळी वाहकाकडे विचारणा करावी लागणार असेल, तर या योजनेचा नेमका फायदा काय, असा प्रश्न उपस्थित होत आहे. तसेच केवळ महिला प्रवासीच नव्हे, तर ज्येष्ठ नागरिक आणि अमृत ज्येष्ठ नागरिक प्रवाशांनाही या निर्णयाबाबत माहिती नसल्यामुळे अडचणींचा सामना करावा लागू शकतो.
महामंडळाने मुदतवाढीच्या निर्णयाची माहिती सर्व आगार, वाहक आणि चालकांपर्यंत तातडीने पोहोचविण्याची गरज आहे. अन्यथा शासनाने सवलत कायम ठेवूनही माहितीअभावी प्रवाशांना पूर्ण तिकीट दराने प्रवास करण्याची वेळ येण्याची शक्यता आहे.
स्रोत: मूळ बातमी
Leave a Reply