ठरलं तर मग: पूर्णाआजींनी बनवलं मृत्युपत्र, सुभेदार हादरले

लोकप्रिय मालिकेच्या ११ नोव्हेंबरच्या भागात अनेक धक्कादायक घडामोडी घडल्या. घरात सगळं काही सुरळीत चालू असताना पूर्णाआजींनी घेतलेला एक निर्णय सुभेदार कुटुंबाला हादरवून सोडणारा ठरला. त्याचवेळी प्रियाच्या हालचालींमुळे सायलीच्या बाळाभोवतीचं गूढ अधिकच वाढलं आहे.

## रुग्णालयात तणाव

सचिनला तुरुंगात टाकल्यामुळे संतापलेली श्वेता प्रियाला जाब विचारते. श्वेताचा राग पाहून प्रिया तिला लवकरच सचिनची सुटका करून देईन, असं खोटं आश्वासन देते आणि तिला शांत करते. आपण रुग्णालयात असून सुभेदारांसोबत आलो आहोत, याचं भान ठेवून श्वेता शांत राहण्याचा निर्णय घेते. मात्र जाण्यापूर्वी ती प्रियाला इशारा देऊन जाते.

दुसरीकडे सायली आणि अर्जुन आपल्या बाळाबद्दल बोलत असतात. अर्जुन सायलीला ती बेशुद्ध असताना आपली काय अवस्था झाली होती, हे सांगत असतो. तेवढ्यात एका बाळाच्या रडण्याचा जोरदार आवाज येऊ लागतो. बराच वेळ रडणं थांबत नाही. त्यामुळे सायलीला त्या बाळाची काळजी वाटू लागते. एक परिचारिका सायलीच्या बाळाला तपासणीसाठी घेऊन जाते. बाहेर बसलेल्या कल्पनालाही त्या रडणाऱ्या बाळाचा त्रास होतो. बाळ एवढं रडत असताना त्याची आई त्याला का उचलत नाही, हा प्रश्न तिला पडतो.

कल्पना आवाजाच्या दिशेने जाते आणि एका खोलीजवळ थांबते. त्या खोलीत प्रिया असते. तिचंच बाळ जोरजोरात रडत असतं. परिचारिका आणि सुरक्षा रक्षक प्रियाला समजावत असतात की बाळ रडत आहे आणि डॉक्टरांनी फॉर्म्युला दूध देऊ नये, असं सांगितलं आहे. मात्र प्रिया बाळाला जवळ घ्यायलाही तयार नसते. कल्पना दार उघडून आत जाणार असतानाच परिचारिका मध्ये येते. कल्पनाच्या प्रश्नांना ती उत्तर देत नाही आणि तिला तिथून जायला सांगते. त्यामुळे प्रिया आणि कल्पना समोरासमोर येणं टळतं.

## पूर्णाआजींची घोषणा आणि मृत्युपत्र

घरात बऱ्याच महिन्यांनी विमल परतली आहे, त्यामुळे सगळे सुभेदार आनंदात आहेत. पूर्णाआजी सर्वांना सांगते की उद्या सायलीच्या बाळाची पाचवीची पूजा आहे. पूजा करून सर्वांनी रुग्णालयात जायचं आहे. तिथे तिला एक महत्त्वाची घोषणा करायची आहे. आजी काय बोलणार, याची सर्वांनाच उत्सुकता असते, पण ती कोणाला काहीच सांगत नाही. ही घोषणा श्वेताने गुपचूप ऐकलेली असते. ती लगेच फोन करून प्रियाला याबाबत कळवते. प्रिया मनात विचार करते की ही आजी काय काय करू शकते, याचा अंदाज आता येऊ लागला आहे. त्यामुळे तिला लवकरात लवकर हालचाल करायला हवी.

दुसरीकडे अस्मितालाही आजी काय घोषणा करणार आहे, हे जाणून घ्यायचं असतं. ती कारण काढून आजीच्या खोलीत जाते, पण आजी तिला ओळखून तिथून पाठवून देते. अस्मिता प्रतापला सांगते की आजीच्या मनात काय चाललं आहे, हे शोधून काढा. प्रताप गुपचूप आजीच्या खोलीत जातो. तिथे आजी एक फाइल घेऊन बसलेली असते. प्रताप ती फाइल खेचून घेतो आणि वाचतो. तेव्हा त्याला समजतं की त्याच्या आईने मृत्युपत्र बनवलं आहे. या निर्णयाचा त्याला मोठा धक्का बसतो. तो आजीला बाहेर घेऊन येतो आणि सर्वांसमोर तिने मृत्युपत्र बनवल्याचं सांगतो. हे ऐकून सर्व सुभेदारही हादरतात.

स्रोत: मूळ बातमी