कोल्हापूरच्या गोकुळ दूध संघाच्या अध्यक्षपदाच्या निवडणुकीची राज्यभरात गेल्या काही दिवसांपासून चर्चा सुरू आहे. या निवडणुकीत एकूण २५ जागांपैकी १३ जागांवर सतेज पाटील यांच्या समविचारी आघाडीचे संचालक निवडून आले, तर १२ जागांवर महायुतीचे संचालक विजयी झाले. अध्यक्षपद सतेज पाटील यांच्या आघाडीकडे जाईल अशी चर्चा असतानाच राज्य सरकारने चार सरकारी संचालकांची नियुक्ती करून त्यांना मतदानाचा अधिकार दिला. या निर्णयामुळे समविचारी आघाडीला धक्का बसला होता.
महायुतीचा संभाव्य फॉर्म्युला काय?
अध्यक्षपदासाठीची निवडणूक १० नोव्हेंबर रोजी सकाळी ११ वाजता ठरली होती. या निवडणुकीत महायुतीकडून अध्यक्षपदाच्या वाटणीसाठी एक फॉर्म्युला निश्चित झाल्याची माहिती समोर आली आहे. या फॉर्म्युल्यानुसार महायुतीतील भाजप, शिवसेना आणि राष्ट्रवादी काँग्रेस या तीन पक्षांमध्ये गोकुळचे अध्यक्षपद सव्वा-सव्वा वर्षासाठी वाटून घेतले जाईल. त्यामुळे पाच वर्षांच्या कालावधीत तीन किंवा चार अध्यक्ष होऊ शकतात, असे महायुतीच्या बैठकीत ठरल्याचे समजते.
या वाटणीनुसार अध्यक्षपद सर्वात आधी राष्ट्रवादी काँग्रेसला, त्यानंतर भाजपला आणि शेवटी शिवसेनेला मिळेल, अशी माहिती आहे. उरलेला कालावधी जनसुराज्य पक्षाचा अध्यक्ष राहणार असल्याचेही सांगितले जात आहे.
पहिले अध्यक्षपद घेण्यास नकारघंटा?
दरम्यान, महायुतीकडून पहिल्यांदा अध्यक्षपद घेण्यासाठी अनेकांनी नकार दिल्याची माहिती समोर आली आहे. महायुतीविरोधातील वातावरणामुळे तिन्ही पक्षांकडून अध्यक्षपद टाळण्याचा प्रयत्न होत असल्याचे सांगितले जात आहे. सध्या राष्ट्रवादी काँग्रेसकडून रणजीतसिंह पाटील यांचे नाव आघाडीवर आहे. रणजीतसिंह पाटील हे माजी आमदार के. पी. पाटील यांचे सुपुत्र आहेत. त्यांच्यासह माजी आमदार राजेश पाटील यांचे नावही चर्चेत आहे.
स्रोत: मूळ बातमी
Leave a Reply