वर्षभर वाहतूक कोंडी, सिग्नलवरील लांबच लांब रांगा आणि वाहनांच्या हॉर्नच्या आवाजाने गजबजलेल्या पुणे शहराचे चित्र दिवाळीच्या सुट्यांमध्ये पूर्णपणे बदलले आहे. शहरातील बहुतांश रस्त्यांवरील वाहनांची गर्दी ओसरल्याने रस्ते मोकळे झाले आहेत. त्यामुळे नेहमी वाहतूक कोंडीत अडकणाऱ्या पुणेकरांना सध्या अवघ्या काही मिनिटांत इच्छित स्थळी पोहोचता येत आहे. मोकळ्या रस्त्यांवरून विनाअडथळा प्रवास करण्याचा आनंद वाहनचालक घेत आहेत.
सुट्यांमुळे वर्दळ घटली
दिवाळीच्या सुट्यांमुळे आयटी क्षेत्रातील कर्मचारी, महाविद्यालयीन विद्यार्थी आणि बाहेरगावाहून पुण्यात नोकरी-व्यवसायासाठी आलेले अनेक नागरिक गावी गेले आहेत. त्यामुळे शहरातील दैनंदिन वर्दळ मोठ्या प्रमाणात कमी झाली आहे. याचा परिणाम प्रमुख चौक, मुख्य रस्ते आणि अंतर्गत मार्गांवरही दिसून येत आहे. नेहमी वाहनांच्या गर्दीने गजबजलेले रस्ते सध्या मोकळे दिसत आहेत. फेरीवाले, दुकानांसमोरील साहित्य आणि अतिक्रमणांमुळे अरुंद झालेल्या काही रस्त्यांवरही सध्या तुलनेने कमी गर्दी जाणवत आहे. सकाळी फिरायला जाणारे नागरिक आणि व्यायामासाठी बाहेर पडणाऱ्यांनाही मोकळ्या रस्त्यांचा अनुभव घेता येत आहे. सिग्नलवर लागणाऱ्या लांब रांगा कमी झाल्याने वाहनचालकांचा वेळ वाचत आहे.
सार्वजनिक वाहतुकीतही दिलासा
सार्वजनिक वाहतुकीतही गर्दीचे चित्र बदलले आहे. नेहमी प्रवाशांनी भरलेल्या पीएमपीएमएल बस आणि मेट्रोमध्ये सध्या तुलनेने कमी गर्दी दिसत आहे. बसमध्ये जागा मिळवण्यासाठी होणारी धावपळ आणि मेट्रो स्थानकांवरील गर्दी कमी झाल्याने प्रवाशांना आरामात प्रवास करता येत आहे. दरम्यान, मोकळ्या पुण्याची चर्चा सोशल मीडियावरही रंगली आहे. ‘पुण्यातील रस्ते वर्षभर असेच मोकळे का राहू शकत नाहीत?’, असा मिश्किल सवाल नागरिकांकडून उपस्थित केला जात आहे. दिवाळीच्या सुट्यांनी पुण्याच्या वाहतुकीला काही दिवसांसाठी का होईना, पण मोकळा श्वास दिला आहे. पुणेकर सदानंद जोशी यांनी सांगितले की, वर्षभर असेच नियोजन राहिले तर पुणेकरांचा प्रवास नक्कीच सुखकर होईल.
स्रोत: मूळ बातमी
Leave a Reply