राष्ट्रवादी काँग्रेसच्या दोन्ही गटांच्या विलिनीकरणाची जोरदार चर्चा सुरू आहे. राष्ट्रवादीचे प्रदेशाध्यक्ष सुनील तटकरे यांनीच या चर्चांना हवा दिली आहे. त्यामुळे राष्ट्रवादीत मोठे काही तरी घडणार असल्याचे सांगितले जात आहे. आज तटकरे पुण्यात असून पक्षाच्या राष्ट्रीय अध्यक्षा सुनेत्रा पवार यांची भेट घेणार आहेत. या भेटीत विलिनीकरणावर चर्चा होण्याची शक्यता वर्तवली जात आहे. या सर्व चर्चा सुरू असतानाच शिंदे गटाचे नेते आणि राज्याचे सामाजिक न्याय मंत्री संजय शिरसाट यांनी आपल्या प्रतिक्रियेतून नवा ट्विस्ट दिला आहे.
शिरसाट यांनी उपस्थित केली तिसऱ्या गटाची शंका
दोन्ही राष्ट्रवादी काँग्रेस एकत्र येण्याऐवजी त्यातून तिसरा गट निर्माण होतो की काय, अशी शंका संजय शिरसाट यांनी उपस्थित केली आहे. सामाजिक न्याय मंत्री संजय शिरसाट यांनी माध्यमांशी संवाद साधताना ही प्रतिक्रिया दिली आहे. राष्ट्रवादीच्या नेत्यांची सुरुवातच एकमेकांवर आरोप करण्यात होत असेल, तर विलिनीकरण होईल असे वाटत नाही, असे शिरसाट म्हणाले. दोन्ही राष्ट्रवादीत अंतर्गत कुस्ती सुरू आहे. सकाळी विलिनीकरणाची चर्चा आणि दुपारी एकमेकांवर आरोप होत असल्याने अंदाज बांधणे कठीण झाले आहे, असे सांगतानाच दोन्ही राष्ट्रवादीचा मिळून तिसरा गट निर्माण होण्याची दाट शक्यता असल्याची शंका त्यांनी व्यक्त केली. त्यांच्या या विधानामुळे राष्ट्रवादीच्या विलिनीकरणाच्या चर्चेला नवे राजकीय वळण मिळाले आहे.
गोकुळ आणि इतर मुद्द्यांवरही भाष्य
यावेळी त्यांनी गोकुळच्या निवडणुकीवरही भाष्य केले. हा पेच पुढे वाढण्याची शक्यता आहे, त्यामुळे आताच बोलणे योग्य नाही, असे शिरसाट म्हणाले. कायदेशीर पेच जोपर्यंत सुटत नाही, तोपर्यंत दोन्ही गटाचे समाधान निघणार नाही; दोन्ही बाजू न्यायालयासमोर मांडल्या आहेत, असे त्यांनी सांगितले. गोकुळ दूध संघ हा पाच लाख शेतकऱ्यांचा संघ असून महाराष्ट्राचे वैभव आहे. तो कुणाच्या दावणीला बांधला जाणार नाही, असे ते म्हणाले. चुकीचा प्रचार थांबवावा; असे घडले तर आम्ही तुमच्या सोबत उभे राहू, असेही त्यांनी स्पष्ट केले. त्यांनी एका भेटीवरही भाष्य केले. सणासुदीच्या काळात गोडवा कायम असला पाहिजे. राजकीय भांडणाला सार्वजनिक जीवनात जोडणे योग्य नाही. भेटण्यात काही गैर नाही; मीही अनेक लोकांना भेटत असतो, असे ते म्हणाले.
स्रोत: मूळ बातमी
Leave a Reply