खासगी कंपनीत नोकरी करून निवृत्त झालेल्या लाखो कर्मचाऱ्यांसाठी एक दिलासादायक बातमी समोर आली आहे. त्यांच्या दरमहा मिळणाऱ्या पेन्शनमध्ये मोठी वाढ होण्याची शक्यता आहे. कर्मचारी भविष्य निर्वाह निधी संघटना अर्थात ईपीएफओ किमान मासिक पेन्शन १००० रुपयांवरून थेट ३००० रुपये करण्याचा विचार करत आहे. त्यामुळे निवृत्त कर्मचाऱ्यांना मोठा दिलासा मिळू शकतो. या संदर्भात १९ नोव्हेंबर रोजी होणाऱ्या महत्त्वाच्या बैठकीकडे लाखो पेन्शनधारकांचे लक्ष लागले आहे.
१९ नोव्हेंबरच्या बैठकीत काय होणार?
मिळालेल्या माहितीनुसार, ईपीएफओच्या सेंट्रल बोर्ड ऑफ ट्रस्टीजची बैठक १९ नोव्हेंबर रोजी गुजरातमधील गिर येथे होणार आहे. या बैठकीत किमान पेन्शन वाढवण्याच्या प्रस्तावावर चर्चा होण्याची शक्यता आहे. सध्या कर्मचारी पेन्शन योजनेअंतर्गत पात्र पेन्शनधारकांना किमान १००० रुपये मासिक पेन्शन मिळते. ही रक्कम वाढवून ३००० रुपये करण्याची मागणी कामगार संघटना अनेक दिवसांपासून करत आहेत. पेन्शन वाढीचा निर्णय झाल्यास लाखो निवृत्त कर्मचाऱ्यांना त्याचा फायदा होऊ शकतो. मात्र याबाबत सरकारकडून अद्याप कोणतीही अधिकृत घोषणा झालेली नाही. त्यामुळे बैठकीत नेमका काय निर्णय होतो, याकडे सर्वांचे लक्ष लागले आहे.
पीएफ आणि पेन्शनची गणना कशी होते?
खासगी क्षेत्रातील कर्मचाऱ्यांच्या मूळ पगारातून आणि महागाई भत्त्यातून १२ टक्के रक्कम भविष्य निर्वाह निधी खात्यात जमा होते. कंपनीकडूनही तेवढेच योगदान दिले जाते. कंपनीच्या योगदानापैकी ८.३३ टक्के रक्कम कर्मचारी पेन्शन योजनेत, तर ३.६७ टक्के रक्कम भविष्य निर्वाह निधी खात्यात जमा होते. पेन्शनची गणना एका ठरावीक सूत्रानुसार केली जाते. मासिक पेन्शन म्हणजे पेन्शनयोग्य सरासरी पगार गुणिले पेन्शनयोग्य सेवा, भागिले ७०. यासाठी किमान १० वर्षांची पात्र सेवा आवश्यक असते. पेन्शनयोग्य पगाराची गणना शेवटच्या ६० महिन्यांच्या सरासरी पगारावर केली जाते. किमान पेन्शन वाढल्यास निवृत्तीनंतरच्या आर्थिक नियोजनाला मोठा आधार मिळू शकतो, असे मानले जात आहे.
स्रोत: मूळ बातमी
Leave a Reply