मराठी मनोरंजनसृष्टीतील लोकप्रिय अभिनेता प्रथमेश परब सध्या एका खास कारणामुळे चर्चेत आला आहे. ‘टाइमपास’ आणि ‘बालक पालक’ यांसारख्या चित्रपटांमधून प्रेक्षकांच्या मनात स्थान निर्माण करणाऱ्या प्रथमेशने पत्नी क्षितिजा घोसाळकर हिच्यासह मुंबईत आणखी एक घर घेतले आहे. विशेष म्हणजे, हे त्याचे मुंबईतील चौथे घर असले तरी पती-पत्नी म्हणून दोघांनी मिळून पहिल्यांदाच स्वतःचे घर बुक केले आहे. या आनंदाची बातमी त्याने सोशल मीडियावर पोस्ट शेअर करत चाहत्यांना दिली.
गोरेगावमध्ये घेतले नवे घर
प्रथमेशने त्याच्या पोस्टमध्ये घराच्या प्रवासाविषयी माहिती दिली आहे. त्याने 2016 मध्ये सायन येथे घर घेतले होते. त्यानंतर 2020 मध्ये अंधेरी आणि 2023 मध्ये मीरा रोड येथे घर खरेदी केले. आता 2026 मध्ये त्याने पत्नी क्षितिजासह गोरेगावमध्ये नवीन घर बुक केले आहे. त्यामुळे त्याच्या घरांची संख्या चार झाली आहे. मात्र, या घराचे महत्त्व त्याच्यासाठी वेगळेच आहे. कारण यापूर्वी घेतलेली घरे आणि पती-पत्नी म्हणून दोघांनी मिळून घेतलेले पहिले घर, या दोन गोष्टींमधील भावना वेगळी असल्याचे त्याने सांगितले.
घर बुक केले अन् गाडीत बसताच अश्रू अनावर
नवीन घर बुक केल्यानंतरचा भावूक अनुभव प्रथमेशने चाहत्यांसोबत शेअर केला. त्याने लिहिले की, मुंबई हे स्वप्नांचे शहर आहे. मोठे शहर, मोठी स्वप्ने आणि स्वतःचे हक्काचे घर असावे, असे स्वप्न त्यांनीही पाहिले होते. घर बुक केल्यानंतर बाहेर येऊन गाडीत बसताच त्याच्या डोळ्यांतून अश्रू वाहू लागले. हा आनंद केवळ नवीन घर मिळाल्याचा नव्हता, तर दोघांनी मिळून पाहिलेले एक स्वप्न सत्यात उतरण्याच्या दिशेने पहिले पाऊल पडले होते, याचे समाधान होते.
प्रथमेशने पोस्टमध्ये पुढे सांगितले की, अद्याप त्यांना घराचा ताबा मिळालेला नाही. घराच्या चाव्या हातात येणे, आपल्या आवडीनुसार प्रत्येक कोपरा सजवणे आणि त्या घरात असंख्य आठवणी तयार करणे, या सगळ्याची दोघांना उत्सुकता आहे. घर कितवे आहे यापेक्षा ते कोणाबरोबर आणि कोणत्या भावनेने घेतले आहे, हे अधिक महत्त्वाचे असल्याचेही त्याने नमूद केले. त्यांच्या या आनंदाच्या बातमीवर चाहत्यांनी शुभेच्छांचा वर्षाव केला आहे.
स्रोत: मूळ बातमी
Leave a Reply