दिवाळीच्या सणात फटाक्यांची आतषबाजी सुरू असतानाच मुंबईत आगीच्या घटनांमध्ये मोठी वाढ झाली आहे. दोन दिवसांच्या कालावधीत शहरात आगीच्या एकूण ८९ घटना घडल्या असून, त्यापैकी २८ घटनांना फटाके कारणीभूत ठरल्याची नोंद अग्निशमन दलाकडे झाली आहे. या घटनांमध्ये एका व्यक्तीचा मृत्यू झाला असून तीन जण जखमी झाले आहेत. सणाच्या काळातही सुरक्षेच्या सूचना किती गांभीर्याने पाळल्या जातात, यावर या आकडेवारीने पुन्हा एकदा प्रश्नचिन्ह उभे केले आहे.
सार्वजनिक ठिकाणी, रस्त्यावर, गल्ल्यांमध्ये आणि फुटपाथवर फटाके फोडण्यावर उच्च न्यायालयाने बंदी घातली आहे. या आदेशानंतर महापालिकेनेही मुंबईकरांना फटाके न फोडण्याचे आवाहन केले होते. प्रदूषण करणाऱ्या फटाक्यांऐवजी हरित फटाक्यांचा वापर करावा, असेही सांगण्यात आले होते. मात्र प्रत्यक्षात या सूचना आणि निर्बंधांचा कितपत परिणाम झाला, हा प्रश्न आता उपस्थित होत आहे.
दोन दिवसांचा तपशील
६ नोव्हेंबर रोजी मुंबईत आगीच्या ३३ घटना घडल्या. त्यापैकी १२ घटना फटाक्यांमुळे लागलेल्या आगीच्या होत्या. दुसऱ्या दिवशी, ७ नोव्हेंबर रोजी आगीच्या घटनांमध्ये मोठी वाढ होऊन हा आकडा ५६ वर पोहोचला. यापैकी १६ आगीच्या घटना फटाक्यांमुळे घडल्या होत्या.
दहिसर पूर्वेतील कंदरपाडा परिसरात ७ नोव्हेंबरला मध्यरात्री १ वाजून ४ मिनिटांनी दोन ते तीन झोपड्यांना आग लागली. ही आग फटाक्यामुळे लागल्याचा अंदाज वर्तवण्यात आला आहे. अग्निशमन दलाने वेळीच आगीवर नियंत्रण मिळवले. ही आग फटाक्यांमधील रॉकेटमुळे लागली असावी, असा अंदाज अग्निशमन दल आणि प्रत्यक्षदर्शींनी व्यक्त केला आहे.
घाटकोपर पंतनगर भागात २१ मजली इमारतीच्या १९ व्या आणि २० व्या मजल्यावर आग लागली. फटाक्यांमधील रॉकेट उडून घरात आल्याने ही आग लागल्याचे प्रत्यक्षदर्शींनी अग्निशमन दलाला सांगितले. या घटनेत तीन जण जखमी झाले होते.
ठाण्यातही आगीच्या घटना
ठाण्यात तीन हात नाका परिसरातील रहेजा गार्डन गृहसंकुलातील कार्लाइल सोसायटीमध्ये रविवारी आग लागली. ही आग आठव्या मजल्यावरून वेगाने १४ व्या मजल्यावर पसरली. अडकलेल्या नागरिकांची सुटका करण्यासाठी रात्री उशिरापर्यंत मोहीम सुरू होती. कळवा येथील कावेरी सेतू भागातील आशर गृहसंकुलात २९ व्या मजल्यावरही आग लागली होती.
गेल्या दोन-तीन दिवसांत मुंबईत विविध कारणांमुळे मोठ्या प्रमाणात आगीच्या घटना घडल्या आहेत. दिवाळीत आगीच्या घटना पाहता अग्निशमन दलाच्या जवानांच्या रजा रद्द करण्यात आल्या आहेत. त्यांना सतर्क राहण्याच्या सूचना देण्यात आल्या आहेत, अशी माहिती प्रमुख अग्निशमन दल अधिकारी रवींद्र आंबुलगेकर यांनी दिली आहे.
स्रोत: मूळ बातमी
Leave a Reply