जनसुराज पार्टीचे संस्थापक प्रशांत किशोर यांचा एक व्हिडीओ सध्या चांगलाच व्हायरल झाला आहे. या व्हिडीओमध्ये ते ब्राह्मण आणि मुस्लिम मतांचे समीकरण समजावून सांगत आहेत. ब्राह्मण समाजाला उद्देशून बोलताना त्यांनी काही प्रश्नही उपस्थित केले आहेत.
मतांची टक्केवारी हेच महत्त्वाचे
किशोर यांनी व्हिडीओमध्ये म्हटले आहे की, तुमचे पूर्वज काँग्रेसच्या काळात आमदार आणि खासदार होते. लोकशाहीमध्ये तुम्हाला कोणाकडून किती टक्के मतदान होऊ शकते, यालाच महत्त्व असते. निवडणूक जिंकायची असेल तर मतदान झाले पाहिजे. तुमची लोकसंख्या तर वाढू शकत नाही, असेही ते म्हणाले. वीस टक्के मतदान हे मुस्लिमांचे होते, असे सांगत त्यांनी पुढे म्हटले की, असं असतानाही तुम्ही भाजपचा झेंडा हाती घेतला आणि समाजमाध्यमांवरून मुस्लिम समाजाला शिव्या देऊ लागलात. त्यामुळे तुम्हाला जे वीस टक्के मतदान होण्याची शक्यता होती, तेही तुमच्या हातून गेले. अशा स्थितीत तुम्ही निवडणूक कशी जिंकू शकता, असा सवाल त्यांनी केला.
तुमची ताकद लेखणी आहे
मुस्लिमांसोबत तुमची कोणत्या गोष्टीची लढाई आहे, असा प्रश्नही किशोर यांनी उपस्थित केला. जमिनीची लढाई आहे की आरक्षणाची, असे त्यांनी विचारले. तुम्ही कधी दंगलीत गेला नाहीत, तुम्ही मुंगीसुद्धा मारू शकत नाहीत, पण समाजमाध्यमांवर जाऊन भाजपचा झेंडा हाती घेतला आणि मुस्लिम समाजाला शिव्या देऊ लागलात, असे ते म्हणाले. त्याचा परिणाम असा झाला की, ज्यांच्या मतदानावर तुम्ही राजा बनत होतात, तेच मतदार तुमच्यापासून दुरावले गेले. तरीही तुम्ही स्वतःला बुद्धिजीवी समजता, हे कोणते ज्ञान आहे, असा टोलाही त्यांनी लगावला. सध्या तुम्हाला परशुरामांचे उदाहरण दिले जात आहे, पण तुम्ही चुकीच्या रस्त्याने चालला आहात, असे सांगत त्यांनी म्हटले की, तुमची खरी ताकद लेखणी आहे आणि तुमची खरी ताकद माता सरस्वती आहे. सध्या तुमची स्थिती अशी झाली आहे की, तुम्हालाच भगवान परशुराम यांची जयंती साजरी करण्यासाठी संघर्ष करावा लागत आहे, असेही त्यांनी नमूद केले.
स्रोत: मूळ बातमी
Leave a Reply