मुंबई-गोवा राष्ट्रीय महामार्ग क्रमांक ६६ लगत असलेल्या पोलादपूर शहरातील सेवा रस्त्यावर खासगी वाहनांचे बेकायदा पार्किंग आणि वाढती वर्दळ यामुळे वाहतुकीचा प्रश्न दिवसेंदिवस गंभीर होत चालला आहे. बसस्थानकासमोरील पुलावर उभी राहणारी खासगी वाहने आणि खाद्यपदार्थांच्या टपऱ्यांमुळे एसटी बसेसना वळण घेताना मोठी कसरत करावी लागत आहे. अरुंद जागेतून बस बाहेर काढताना चालकांची चांगलीच तारांबळ उडत असून, या परिस्थितीमुळे अपघाताचा धोका वाढला आहे.
शाळा, रुग्णालय आणि मंदिरामुळे दिवसभर वर्दळ
सेवा रस्त्यालगत सरकारी रुग्णालय, माध्यमिक आणि उच्च माध्यमिक शाळा तसेच काळभैरवनाथ मंदिर असल्याने या परिसरात दिवसभर नागरिकांची ये-जा सुरू असते. त्यात खासगी ट्रॅव्हल्सच्या बसेसची रांग आणि बेशिस्त पार्किंगची भर पडल्याने दुचाकीस्वार, चारचाकी वाहनचालक आणि पादचाऱ्यांना अडचणींचा सामना करावा लागत आहे. शहरातील अंडरपास मार्गिकेवर पाच समांतर पूल जोडण्यात आले आहेत आणि या पुलांवरच खासगी वाहनांचे पार्किंग तसेच खाद्यपदार्थांच्या टपऱ्या उभारण्यात आल्या आहेत.
विशेषतः बसस्थानकासमोरील पुलावर वाहनांची गर्दी असल्याने कोकणातून येणाऱ्या आणि बसस्थानकातून बाहेर पडणाऱ्या एसटी बसेसना वळण घेणे कठीण होत आहे. महाबळेश्वरकडे जाणाऱ्या पर्यटकांची वाढती संख्या आणि खासगी ट्रॅव्हल्सची वर्दळ यामुळे या मार्गावरील वाहतुकीचा ताण आणखी वाढला आहे.
प्रशासनाकडे निवेदने, मात्र ठोस कार्यवाही नाही
खासगी ट्रॅव्हल्स व्यावसायिकांनी आपल्या व्यवसायासाठी स्वतंत्र जागेची व्यवस्था करावी आणि सार्वजनिक रस्त्याचा वापर खासगी वाहनांच्या पार्किंगसाठी होऊ नये, अशी भूमिका नागरिकांकडून मांडली जात आहे. या समस्येबाबत भाजप आणि राष्ट्रवादी काँग्रेस पक्षाच्या वतीने यापूर्वी प्रशासनाला निवेदने देण्यात आली आहेत, मात्र अद्याप ठोस कार्यवाही झालेली नसल्याने नागरिकांमध्ये नाराजी आहे.
सेवा रस्त्यावरील बेकायदा पार्किंग हटवून पुलांवरील वाहने बाजूला करावीत, खाद्यपदार्थांच्या टपऱ्यांचे योग्य नियोजन करावे आणि एसटी बसला वळण घेण्यासाठी पुरेशी जागा उपलब्ध करून द्यावी, अशी मागणी होत आहे. वाहतूक पोलीस, महामार्ग प्रशासन आणि स्थानिक प्रशासनाने समन्वय साधून तातडीने उपाययोजना कराव्यात, असे नागरिकांचे म्हणणे आहे. एखादी दुर्घटना घडल्यानंतरच प्रशासनाला जाग येणार का, असा सवालही नागरिक उपस्थित करीत आहेत.
स्रोत: मूळ बातमी
Leave a Reply