झोप ही केवळ विश्रांती नाही, तर ती एक स्पर्धा ठरू शकते आणि त्यातून लाखो रुपयेही मिळू शकतात, हे ऐकून तुम्हाला मस्करी वाटेल. पण हे खरं आहे. मुंबईत राहणाऱ्या एका महिलेने झोपेच्या स्पर्धेत भाग घेतला आणि लाखो रुपयांचे बक्षीस जिंकले. त्या देशाच्या पहिल्या स्लीप चॅम्पियन ठरल्या आहेत.
मुंबईत राहणाऱ्या जिनिया चॅटर्जी यांनी वेकफिट कंपनीच्या पाचव्या स्लीप इंटर्नशिप स्पर्धेत पहिला क्रमांक पटकावला आहे. सलग ६० दिवस आपल्या झोपेवर आणि दैनंदिन दिनचर्येवर लक्ष केंद्रित करून त्यांनी ९.६ लाख रुपयांचे बक्षीस जिंकले. त्याबरोबरच त्यांना कंपनीकडून प्रायोजित सुट्टीही मिळाली आहे. ही संधी त्यांना एका इंटर्नशिपमधून मिळाली. या इंटर्नशिपमध्ये काम करणे एवढीच जबाबदारी नव्हती, तर चांगली झोप घेणे आणि काही आव्हाने पूर्ण करणे हेदेखील त्यात होते.
साधारणपणे इंटर्नशिपमुळे तरुणांना कंपनीसोबत काम करण्याचा अनुभव मिळतो आणि त्यासाठी विद्यावेतन दिले जाते. पण हा उपक्रम खूपच वेगळा आहे. यामध्ये सहभागी होणारे स्पर्धक झोपेची गुणवत्ता सुधारणे, नियमित वेळी झोपणे आणि पुरेशी विश्रांती घेणे यावर लक्ष केंद्रित करतात. ही स्पर्धा सुमारे ६० दिवस चालली. या काळात सर्व सहभागींच्या झोपेचा मागोवा घेण्यात आला आणि त्यांच्या कामगिरीच्या आधारावर गुण दिले गेले.
दोन लाख अर्ज, दहा स्पर्धक
देशभरातून दोन लाखांहून अधिक लोकांनी या स्पर्धेसाठी अर्ज केला होता. छाननीनंतर केवळ दहा स्पर्धकांची निवड करण्यात आली. त्यामधून जिनिया चॅटर्जी यांनी पहिला क्रमांक पटकावला. ६० दिवसांनंतर मणिकंदन, जिनिया चॅटर्जी आणि रत्नागिरीची मेहक खोट हे अव्वल तीन स्पर्धक म्हणून समोर आले. हैदराबादच्या करीम खानला वाईल्ड कार्ड प्रवेश मिळाला. त्यामुळे चार स्पर्धकांनी अंतिम फेरीत प्रवेश केला.
अंतिम फेरीत मेमरी फोम चॅलेंजमध्ये स्पर्धकांना एका फोटोवरून बेडरूमची प्रतिकृती तयार करायची होती. त्यानंतर स्लीप ऑक्शन झाले, जिथे त्यांनी उशा, ब्लँकेट्स, एसी, लाइटिंग आणि साउंड सिस्टीम यांसारख्या सुविधांवर बोली लावली. अखेरीस सर्व सहभागींच्या झोपेच्या गुणांचे मूल्यांकन करण्यात आले आणि जिनिया विजेती ठरली.
फक्त झोप नाही, तर बरंच काही
या इंटर्नशिपमध्ये सहभागींना केवळ अंथरुणात आराम करायचा नव्हता, तर साप्ताहिक सर्जनशील उपक्रमांमध्येही भाग घ्यायचा होता. यामध्ये स्लीप सिनेमा नावाच्या आव्हानाचा समावेश होता, ज्यामध्ये झोपेशी संबंधित प्रसिद्ध चित्रपटांमधील दृश्यांची पुनर्रचना करायची होती. स्लीप बिंगोमध्ये त्यांच्या झोपेच्या सवयींचे मूल्यांकन केले जात होते. तर अंडरकव्हर स्लीप मिशनमध्ये सामान्य संभाषणादरम्यान संशय येऊ न देता ब्लँकेट किंवा पिलो यांसारखे शब्द दहा वेळा वापरायचे होते. प्रत्येक आठवड्यात सर्वोत्तम कामगिरी करणाऱ्या स्पर्धकाला प्रो स्लीपर ऑफ द वीक हा किताब दिला जात होता.
या उपक्रमाची सुरुवात २०१९ मध्ये झाली. कंपनीच्या माहितीनुसार पहिल्या चार सत्रांमध्ये दहा लाखांहून अधिक अर्ज आले होते आणि ६५ इंटर्न्सना प्रत्येकी एक लाख रुपयांचे मानधन देण्यात आले. आता पाचव्या सत्राच्या विजेत्याला ९.६ लाख रुपये मिळाले आहेत. कंपनीने सहाव्या सत्रासाठी पूर्वनोंदणीही सुरू केली आहे. चांगल्या झोपेचे महत्त्व लोकांना पटवून देणे आणि त्यांना निरोगी जीवनशैली स्वीकारण्यासाठी प्रेरित करणे, हा या उपक्रमाचा उद्देश आहे.
स्रोत: मूळ बातमी
Leave a Reply