कॅन्सरच्या १३७ औषधांच्या किमती कमी, ९ नोव्हेंबरपासून लागू

कॅन्सरच्या रुग्णांना मोठा दिलासा मिळाला आहे. कॅन्सरशी संबंधित १३७ औषधांच्या किमती लक्षणीयरीत्या कमी होणार आहेत. या औषधांवरील व्यापारी नफा निश्चित करण्यात आल्याने किमतीत मोठी घट झाली आहे. रसायन आणि खते मंत्रालयाच्या औषधनिर्माण विभागाने ही माहिती दिली आहे.

९ नोव्हेंबरपासून नवीन दर लागू

या १३७ औषधांचे नवीन सुधारित दर ९ नोव्हेंबरपासून लागू होणार आहेत. या निर्णयामुळे ग्राहकांची अंदाजे वार्षिक ३,५०२.३१ कोटी रुपयांची बचत होईल, असा अंदाज आहे. आरोग्य सेवा महासंचालनालयाच्या अंतर्गत गठीत केलेल्या तज्ज्ञ समितीने १७ ऑक्टोबर रोजी केलेल्या शिफारशींनंतर हा निर्णय घेण्यात आला. राष्ट्रीय औषध मूल्य निर्धारण प्राधिकरणाने कर्करोगाच्या उपचारात वापरल्या जाणाऱ्या १३७ औषधांवरील व्यापारी नफा निश्चित केला आहे.

नवीन दरसूची किरकोळ विक्रेते, औषध वितरक आणि रुग्णालयांनी त्यांच्या आस्थापनांमध्ये आणि वेबसाइटवर ठळकपणे प्रदर्शित करणे बंधनकारक करण्यात आले आहे. या आदेशाच्या पालनावर देखरेख ठेवण्याची जबाबदारी राज्य औषध नियंत्रकांवर सोपवण्यात आली आहे.

किती कपात झाली?

आतापर्यंत ७६ औषध कंपन्यांनी १२१ औषधांच्या १,२२५ फॉर्म्युलेशन्ससाठी नवीन किमती सादर केल्या आहेत. यापैकी १,०३१ फॉर्म्युलेशन्सच्या किमतीत कपात झाली आहे. जवळपास ६०० ब्रँड्सच्या किमतीत ५० टक्क्यांहून अधिक कपात झाली असून सर्वाधिक कपात ९६.४५ टक्के इतकी आहे. व्यापारी नफ्याची ही किंमत मर्यादा भारतात अद्याप उपलब्ध न झालेल्या १०-१५ औषधांनाही ती उपलब्ध झाल्यावर लागू होईल.

उदाहरणार्थ, स्तनाच्या कर्करोगावरील पॅल्बोप्रो कॅप्सूल (पॅल्बोसायक्लिब १२५ मिग्रॅ) ची किंमत ४०,४२१.३३ रुपयांवरून २,७२० रुपयांपर्यंत कमी करण्यात आली आहे. त्याचप्रमाणे, प्रोस्टेट कर्करोगावरील अबिरॉन टॅब्लेट (अबिराटेरोन ॲसिटेट २५० मिग्रॅ) ची किंमत ४१,२५० रुपयांवरून ३,२१८.२३ रुपये झाली आहे.

स्रोत: मूळ बातमी