मराठी चित्रपटातून आपल्या अभिनयाची चुणूक दाखवत राष्ट्रीय पुरस्कारावर नाव कोरणारी बालकलाकार त्रिशा ठोसर आता बॉलिवूडमध्ये पदार्पण करण्यासाठी सज्ज झाली आहे. पहिल्याच हिंदी चित्रपटात तिला इम्रान हाश्मी आणि जिनिलिया देशमुख यांसारख्या लोकप्रिय कलाकारांसोबत काम करण्याची संधी मिळाली आहे. आदित्य दत्त दिग्दर्शित ‘गनमास्टर जी९’ या अॅक्शन थ्रिलरमधून त्रिशा हिंदी चित्रपटसृष्टीत पाऊल ठेवत आहे.
या चित्रपटात इम्रान एजंट जी९, अर्थात ईश्वरच्या भूमिकेत दिसणार असून, जिनिलिया आणि अपारशक्ती खुराना यांच्याही महत्त्वाच्या भूमिका आहेत. ‘गनमास्टर जी९’चा टीझर नुकताच समोर आला होता. त्यात इम्रानचा डॅशिंग आणि स्टायलिश अॅक्शन अंदाज पाहायला मिळत आहे. चित्रपटात त्याच्यासोबत जिनिलिया देशमुख मुख्य भूमिकेत असून, दोघांची फ्रेश केमिस्ट्री प्रेक्षकांना आकर्षित करत आहे. याशिवाय अपारशक्ती खुराना या चित्रपटात एका हटके आणि मुख्य खलनायकाच्या भूमिकेत झळकणार आहे.
‘नाळ २’मधून मिळाला राष्ट्रीय पुरस्कार
‘नाळ २’ या मराठी चित्रपटातील चिमी, अर्थात रेवतीच्या भूमिकेतून प्रेक्षकांची मने जिंकणाऱ्या त्रिशाने सर्वोत्कृष्ट बालकलाकाराचा राष्ट्रीय चित्रपट पुरस्कार पटकावला. राष्ट्रीय पुरस्कारानंतर मिळालेल्या संधीविषयी त्रिशा सांगते की, तिच्यासाठी हा अनुभव खूप खास आहे. ‘नाळ २’मधील चिमीच्या भूमिकेला प्रेक्षकांनी भरभरून प्रेम दिले आणि राष्ट्रीय पुरस्कार मिळणे ही तिच्यासाठी स्वप्नवत गोष्ट होती. हा पुरस्कार खूप मोठा असून आता कलाकार म्हणून तिची जबाबदारी वाढली आहे, असे तिला तिच्या आईने समजावून सांगितले आहे. यावेळी इम्रान हाश्मी आणि जिनिलिया देशमुख यांच्यासोबत काम केल्याचे तिने सांगितले. दिग्दर्शक आदित्य दत्त यांनी जसे सांगितले तसे तिने नीट काम केले. शाळेचा अभ्यास आणि अभिनय असे दोन्ही छान करायचे, असे इम्रान यांनी तिला सांगितल्याचेही त्रिशाने नमूद केले.
२० वर्षांनंतर प्रसिद्ध त्रिकुट पुन्हा एकत्र
या चित्रपटाच्या निमित्ताने इम्रान हाश्मी, संगीतकार हिमेश रेशमिया आणि दिग्दर्शक आदित्य दत्त ही प्रसिद्ध त्रयी तब्बल २० वर्षांनंतर पुन्हा एकदा एकत्र आली आहे. यापूर्वी या तिघांनी २००५ मध्ये एकत्र काम केले होते. या चित्रपटाचे संगीत हिमेश रेशमियाने दिले असल्याने गाणी हिट ठरण्याची प्रेक्षकांना मोठी आशा आहे.
स्रोत: मूळ बातमी
Leave a Reply