साक्री आगारातून नाशिककडे जाणाऱ्या एसटी बसने तीन प्रवाशांना पिंपळनेर बसस्थानकावर अचानक उतरवून दिल्याची घटना शनिवारी दुपारी घडली. प्रवाशांकडून नाशिकपर्यंतचे पूर्ण भाडे घेऊन तिकीट दिल्यानंतरही त्यांना पुढील प्रवासाची कोणतीही पर्यायी व्यवस्था न करता सोडून देण्यात आले, अशी प्रवाशांची तक्रार आहे. पुढील प्रवासाचा लेखी मेमोही न देता वाहक बससह निघून गेल्याने एसटी महामंडळाच्या कारभारावर संताप व्यक्त होत आहे.
तिकीट नाशिकचे, उतरवले पिंपळनेरला
साक्री आगारातून दुपारी १२.४५ वाजता सुटणाऱ्या नाशिक बसने जी. टी. मोहिते आणि त्यांच्या परिवारातील ज्येष्ठ नातेवाईक प्रवास करत होते. पिंपळनेर बसस्थानकावर पोहोचल्यानंतर साक्री आगाराचे वाहक राठोड यांनी गाडीत पुरेसे प्रवासी नसल्याचे कारण सांगत तिन्ही प्रवाशांना जबरदस्तीने खाली उतरवले. त्यानंतर प्रवाशांची कोणतीही पर्यायी सोय न करता ती बस थेट धुळ्याच्या दिशेने परत फिरवण्यात आली. प्रवाशांना खाली उतरवताना वाहकाने पुढील प्रवासासाठी कोणताही लेखी मेमो, तिकिटावर शेरा किंवा अधिकृत नोंद केली नाही.
दुसऱ्या बसनेही प्रवेश नाकारला
दरम्यान, पिंपळनेर बसस्थानकावर उभ्या असलेल्या दुसऱ्या एका बसमधून नाशिकला जाण्याचा प्रयत्न प्रवाशांनी केला; मात्र त्या बसच्या चालकाने प्रवाशांचे म्हणणे ऐकून न घेता बस रिकामीच नाशिकच्या दिशेने नेली. यानंतर नंदुरबारकडून नाशिककडे जाणारी दुसरी बस पिंपळनेर बसस्थानकावर आली असता, मोहिते आणि त्यांच्या नातेवाइकांनी संबंधित वाहकाला नाशिकपर्यंत घेऊन जाण्याची विनंती केली. मात्र, आधीच्या वाहकाने तिकिटावर कोणताही अधिकृत शेरा दिलेला नसल्याने त्यांना पुढील प्रवासासाठी मोठ्या अडचणींचा सामना करावा लागला. याप्रकरणी मोहिते यांनी साक्री आगार व्यवस्थापक राजेंद्र अहिरे यांना दूरध्वनीवरून संपर्क साधून तक्रार केली आहे.
स्रोत: मूळ बातमी
Leave a Reply