दुष्काळाची सावली जिल्ह्यावर असली तरी दिवाळीच्या निमित्ताने नंदुरबारची बाजारपेठ आनंदाने आणि गर्दीने फुलून गेली आहे. धनत्रयोदशीपासून खरेदीचा उत्साह वाढला असून दागिने, वाहने, कपडे, इलेक्ट्रॉनिक्स वस्तू आणि फराळाच्या खरेदीतून कोट्यवधी रुपयांची उलाढाल होत आहे.
दुष्काळाचा अंदाज फोल; धनत्रयोदशीपासून गर्दी
दुष्काळामुळे यंदा दिवाळीची उलाढाल घटेल, अशी शक्यता व्यक्त केली जात होती. मात्र हा अंदाज खोटा ठरला. धनत्रयोदशीपासून बाजारात उत्साह दिसू लागला. नंदुरबार शहरातील सिंधी कॉलनी आणि शास्त्री मार्केट परिसरात ग्रामीण भागातील नागरिक कपडे व इतर वस्तू खरेदीसाठी मोठ्या संख्येने आले. किराणा साहित्य, फराळ, मातीच्या मूर्ती, दिवे-पणत्या, घरगुती वस्तू, कपडे आणि इलेक्ट्रॉनिक्स वस्तूंसाठी दुकानांमध्ये गर्दी दिसत आहे. दुपारनंतर गर्दी आणखी वाढते. शहरात दुचाकी आणि चारचाकी वाहने रस्त्यांच्या कडेला व मोकळ्या जागेत मोठ्या संख्येने उभी राहत असून त्यामुळे वाहतूक कोंडीची समस्या निर्माण होत आहे.
सराफा बाजारात झळाळी; वाहन नोंदणीत वाढ
गेल्या काही महिन्यांपासून सोने-चांदीचे दर सातत्याने खाली येत होते. दिवाळीचे पर्व सुरू होताच दरांत वाढ झाली. दरवाढ आणि दुष्काळी स्थिती यामुळे सुरुवातीला दागिन्यांच्या खरेदीला प्रतिसाद कमी होता. मात्र धनत्रयोदशीला सराफा बाजारात झळाळी दिसली आणि ग्राहकांच्या प्रतिसादामुळे कोट्यवधी रुपयांची उलाढाल झाली. गांधी पुतळा, हाट दरवाजा, नेहरू चौकातील फटाका बाजार आणि मंगळ बाजारात रात्री उशिरापर्यंत खरेदीदारांची वर्दळ होती. दिवाळीच्या काळात प्रादेशिक परिवहन विभागाकडे सुमारे १५० चारचाकी वाहनांची नोंदणी झाली आहे. शंभरहून अधिक ट्रॅक्टर आणि चारशेहून अधिक दुचाकी वाहनांची नोंदणी प्रक्रिया सुरू आहे. मातीच्या विविध आकाराच्या नक्षीकाम केलेल्या पणत्यांना मोठी मागणी आहे. रंगीबेरंगी आकाश कंदील, झेंडूची फुले आणि रांगोळी पावडरचीही मागणी वाढली आहे. व्यवसायाला चालना मिळाल्याने व्यापारी वर्गात समाधानाचे वातावरण आहे.
स्रोत: मूळ बातमी
Leave a Reply