टेंभुर्णी येथील विठ्ठलराव शिंदे सहकारी साखर कारखान्याच्या दोन्ही युनिटमध्ये २०२६-२७ चा गाळप हंगाम सुरू झाला आहे. पिंपळनेर (युनिट क्रमांक १) आणि करकंब (युनिट क्रमांक २) या दोन्ही युनिटमध्ये गाळप सुरू असून, १५ ते २५ ऑक्टोबरदरम्यान गाळपासाठी आलेल्या उसाला प्रतिटन तीन हजार रुपयांप्रमाणे ॲडव्हान्स हप्ता शेतकऱ्यांच्या बँक खात्यात जमा करण्यात आला आहे. यासाठी एकूण ५६ कोटी रुपये अदा करण्यात आल्याची माहिती संस्थापक चेअरमन तथा माजी आमदार बबनराव शिंदे यांनी दिली.
आतापर्यंतचे गाळप
दोन्ही युनिटमध्ये आतापर्यंत एकूण तीन लाख १५ हजार ४०८ मेट्रिक टन उसाचे गाळप झाले आहे. त्यापैकी पिंपळनेर युनिटमध्ये दोन लाख ३४ हजार ५०७ मेट्रिक टन, तर करकंब युनिटमध्ये ८० हजार ९०१ मेट्रिक टन गाळप झाले आहे.
यापुढेही दर दहा दिवसांनी ऊस बिलाचे पेमेंट केले जाणार आहे. २६ ते ३१ ऑक्टोबरदरम्यान गाळपासाठी आलेल्या उसाचे बिल दिवाळीनिमित्त पुढील तीन ते चार दिवसांत शेतकऱ्यांच्या खात्यात जमा करण्यात येणार आहे.
कर्मचाऱ्यांना बोनस
कारखान्याच्या दोन्ही युनिटमधील अधिकारी व कर्मचाऱ्यांना दिवाळीनिमित्त ८.३३ टक्के बोनस देण्यात आला आहे. यावेळी व्हाईस चेअरमन पोपटभाऊ गायकवाड, कार्यकारी संचालक एस. एन. डिग्रजे, करकंब युनिटचे जनरल मॅनेजर पी. एस. येलपले आणि खातेप्रमुख उपस्थित होते.
स्रोत: मूळ बातमी
Leave a Reply