मराठी मनोरंजनविश्वातील ज्येष्ठ अभिनेते, लेखक आणि दिग्दर्शक संजय मोने सध्या सोशल मीडियावर चर्चेत आहेत. ‘कोण होणार करोडपती’ या लोकप्रिय कार्यक्रमाच्या नव्या पर्वात अभिनेत्री माधुरी दीक्षित सूत्रसंचालन करत आहे. या कार्यक्रमावर भाष्य करताना संजय मोने यांनी एक उपरोधिक पोस्ट शेअर केली होती. त्यांच्या या पोस्टनंतर सोशल मीडियावर मोठी चर्चा सुरू झाली. अनेकांनी त्यांच्या मताचे समर्थन केले, तर काही नेटकऱ्यांनी त्यांना लक्ष्य करत ट्रोल केले. आता या टीकेला संजय मोने यांनी सडेतोड उत्तर दिले आहे.
नेमके काय म्हणाले होते मोने?
‘कोण होणार करोडपती’मध्ये माधुरी दीक्षित सूत्रसंचालन करताना दिसत आहे. हा कार्यक्रम पाहिल्यानंतर संजय मोने यांनी अमिताभ बच्चन आणि माधुरी दीक्षित यांच्या संदर्भात एक पोस्ट लिहिली होती. त्यामध्ये त्यांनी एका जुन्या मराठी म्हणीचा उल्लेख करत कार्यक्रमाच्या सादरीकरणावर प्रश्न उपस्थित केला होता. मात्र, आपली टीका कलाकारांच्या अभिनयावर किंवा माधुरी यांच्या व्यक्तिमत्त्वावर नव्हती, तर कार्यक्रमाच्या सादरीकरणाबद्दल होती, असे त्यांनी स्पष्ट केले.
या पोस्टनंतर अनेकांनी संजय मोने यांच्या वैयक्तिक आयुष्यावरही टिप्पणी केली. काही नेटकऱ्यांनी त्यांच्या पत्नीचा उल्लेख करत त्या त्यांच्यापेक्षा अधिक लोकप्रिय असल्याचे म्हटले. यावर उत्तर देताना मोने म्हणाले की, त्यांची पत्नी आपल्यापेक्षा अधिक लोकप्रिय आणि गुणी आहे, हे त्यांनी तब्बल २७ वर्षांपूर्वीच मान्य केले आहे. त्यामुळे अशा प्रतिक्रियांमुळे आपल्याला राग येण्याचे काहीच कारण नाही.
मुलीबद्दलच्या प्रश्नांनाही उत्तर
काही लोकांनी त्यांच्या मुलीबद्दल ‘तिला करायला सांगा हा कार्यक्रम’ असा प्रश्न उपस्थित केला होता. त्यावर मोने यांनी सांगितले की, त्यांची मुलगी सगळ्यांच्या मनातही येणार नाही, अशा विषयात पदव्युत्तर शिक्षण घेऊन सध्या ऑस्ट्रेलिया येथे नोकरी करत आहे. त्याआधी ती प्रकाशबाबा आमटे यांच्याकडे दीड महिना राहून आली आहे, जिथे ना मॉल, ना मॅकडोनाल्ड, ना चित्रपटगृह अशी परिस्थिती होती. इंग्रजी माध्यमात शिक्षण घेऊनही मराठी बोलताना तिच्या वाक्याची सुरुवात ‘सो’ या शब्दांनी होत नाही. तिला हवे ते अधिक शिक्षण घेऊन मायदेशी येण्याची तीव्र इच्छा आहे, पण तिच्या शिक्षणाचा उपयोग इथे आजतरी किंवा नजीकच्या भविष्यात नाही, असेही त्यांनी नमूद केले.
आपल्या लायकीबद्दल लिहिणाऱ्यांना एकदाच उत्तर देऊन त्यांची कीव करावी, ही त्यांची लायकीही नाही, असे मोने म्हणाले. आपण ४२ वर्षे या व्यवसायात असल्याचे सांगताना त्यांनी ६० नाटके, ४० चित्रपट आणि ३० मालिका, ९ चित्रपटांचे लेखन, ७ नाटकांचे लेखन आणि एक लाख स्तंभलेखन केल्याचे नमूद केले. मत मांडणाऱ्याला प्रतिक्रिया देण्याचा अधिकार मान्य असल्याचे सांगताना, प्रतिक्रिया देणाऱ्याची तितकी लायकी असली पाहिजे, असेही ते म्हणाले. ‘तुम्ही एकदा केबीसीसारखा कार्यक्रम करून दाखवा’ या प्रश्नावर त्यांनी मराठीत ‘कानाला खडा’ नावाचा कार्यक्रम करून दाखवल्याचे आणि इतरही कार्यक्रमांचे सूत्रसंचालन केल्याचे सांगितले. ज्यांनी लिहिले आणि ते लिहिताना जितके शब्द वापरले, तितक्या संख्येची पुस्तके आपण वाचलेली आहेत, असे सांगत त्यांनी हा विषय संपवला आहे.
स्रोत: मूळ बातमी
Leave a Reply